“At essi difficili a si sarvai e depeus cumbatiri in dogna partida, ma sa gana, su giogu e sa barra amostaus in is urtimas partidas est su caminu meglius”.
Fueddus de Tomasu Giulini, su presidenti de su Casteddu, chi at chistionau de sa scuadra e de sa cuntierra po non ci calai in sa serie B, in s’atobiu “Diversi perché unici”, aprontau in Casteddu de sa sociedadi cun a su costau sa Citadi metropolitana.
“Est de importu mannu cussu chi eus bidu finas in sa partida cun su Monza, chena pensai a su gol galanu mede fatu de Danieli Maldini. Custu est su caminu chi eus pigau in is urtimas partidas, chi iau lassau a un’ala in cussas a innantis. Immoi lompit su dificili, at a tocai a gherrai sempiri, ma partidas comenti cussas de Monza e de Empoli nosi depint imparai cussu chi depeus fairi po nosi sarvai”.
“Calencuna bia sussedit – sighit a nai Giulini – ndi pigas tres puntus cun miniscimentus pagus, dapoi sussedit de perdiri candu invecias tenias miniscimentus. Sa manera bida in Monza e Empoli nos at a portai a pigai cussus puntus chi nosi mancant po lompiri a s’obietivu. Chistionu de custas urtimas duas partidas giogadas foras Casteddu, poita a innantis est propriu a tesu de s’Isula chi eus faddiu”.
De importu est a torrai a biri in campu cussus giogadoris chi no istant beni, arregodat Giulini, chi in segus chistionat de cussu chi fut sussediu a pustis Casteddu-Lazio, candu Ranieri si fut postu a una parti: “No est Ranieri o unu giogadori chi nosi sarvant. Ddu depeus fairi totu paris andendu de una parti feti. Teneus abbisongiu de dognunu, a partiri de is capitanus comenti Pavoletti, Deiola e Nandez finas a lompiri a Aresti e a Mancosu chi nosi sulant a is palas de foras”.
Su presidenti, a pustis, arregodat finas cussu chi fut sussediu in Bari ocannu passau: “Ddu depeus fairi ocannu puru cussu meraculu. Immoi lompit su tempus caglienti po su campionau. Nosi depeus fairi agatai prontus”.
Màuru Mura
Cenarba, su binti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.varesenews.it/2019/10/tommaso-giulini-le-emozioni-del-cagliari/863427/
