Non ce dd’at fata su Casteddu a onorai sa memoria de Gigi Riva eris in sa Unipol Domus in sa partida cun su Torinu. Is granatas de Juric ant bintu po 2-1, ma s’arresultau mai est stetiu postu in discussioni, chi non in s’urtimu cuartu de ora, a pustis su gol de Viola. Su matessi Viola, chi a parrer nostu est su giogadori de Ranieri cun is peis prus bonus, est partiu de sa panchina. Is tifosus de su Casteddu ddu iant a bolli sempiri in campu, ma est a nai ca Ranieri, allenadori mannu cun esperientzia, connoscit meglius de totu is piciocus chi tenit a disponimentu e cumprendit de fubalu. Sa partida a pigau una mirada trota giai de su cumentzu e giai in sa parti de unu is piciocus de Juric ant postu is cosas in craru: dus gol e sonumancu atras tres paradas de Scuffet spantosas. Zapata, a pustis una calada che unu trenu de Bellanova, e Ricci, a pustis un’atzioni fendu passai sa bocia in mesu de is cambas de Wieteska, cussus chi ant fatu is gol.
In sa parti de duas, massimamenti cun s’imbucamentu in campu de Pavoletti cun Viola, su Casteddu at tentu sa fortza de torrai a oberri sa partida, ma est a nai ca su Torinu erriscus mannus non dd’at tentu, chi non a s’acabbu cun dd’unu tiru de Lapadula sarvau de conca de su georgianu Sazonov.
Po su Casteddu sa classifica est cussa chi est, ma giai si sciat de su cumentzu chi iari depiu gherrai po si sarvai e aici est. Immoi, is duas partidas chi ant a lompiri funt dificilis meda, ca andat a atobiai a innantis sa Roma de De Rossi in Roma e, a pustis, sa Latzio de Sarri in Casteddu. In segus un’atra partida foras cun s’Udinese chi tenit is matessis puntus de su Casteddu e dapoi su Napoli de Mazzarri in Casteddu etotu e s’Empoli in domu insoru. Cincu partidas cun dificoltadis mannas, ma candu si cumentzat a gherrai seus segurus ca Ranieri ddu at a sciri fairi.
Màuru Mura
Sabudu, su bintiseti de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=GD4r68KeA3g
