E imoi funt cuatru is partidas perdias de sighiu de su Casteddu. Eita tocat a fairi? Tocat a ci stupai s’allenadori o abisongiat a tenni fidi in Di Francesco? Eus benni a biri in is oras chi erribant! Acabat 1-0 po sa Fiorentina sa partida giogada eriseru, a is ses de merì, in Firenze. Su Casteddu at faddiu sa prus facili de is ocasionis po fairi gol cun Joao Pedro, lastima manna airi sbagliau su rigori donau de s’arbitru Giacomelli candu fut acabendu su primu tempus. Di Francesco, po custa partida chi fut importanti meda, iat scioberau custus ominis: Cragno, Pisacane, Walukiewicz, Godin, Lykogiannis, Oliva, Marin, Nainggolan, Sottil, Joao Pedro e Simeone e in segus at fatu intrai Zappa, Tramoni, Pavoletti e Cerri.

Sa partida est stetia ecuilibrada e s’est cumprendiu inderetura ca chini segnaiat po primu binciat sa cuntierra. Imoi is casteddaius s’agatant sempiri a catodixi puntus a su costau de su Genoa e de su Spetzia, chi ancora depit giogai oi. Sa zona caglienti est feti a dus puntu aunia s’agatant su Torinu cun su Parma e tocat a si moviri a torrai a binciri. Parit sinnada sa prossima partida, cun su Milan, ma su giogu de su palloni at arregalau paginas bellas po is prus debbilis e non si depit cumentzai giai bintus.

“Seus inchietus. Eus giogau una partida cun gana, in d’unu campu chi est dificili po totus comenti custu de Firenze. Eus faddiu unu rigori chi podiat ponni sa partida in manera diversa, creiaus de tenni sa partida in manu ma no est andada aici. Candu bincit sa scuadra chi at giogau meglius soi su primu a nai ca est giustu, ma in custa manera non creu chi ddu siat. In is urtimas partidas non si podit nai ca sa fortuna nos at agiudau!”, is fueddus de Di Francesco a pustis sa partida chi poi at sighiu a nai: “Soi arriolau po sa classifica, deu comenti de totus. Tocat a cicai de cambiai, ma possu nai ca giogaus meda meglius de cussu chi narant is numurus”.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.calciomercato.com/news/fiorentina-una-vittoria-che-vale-oro-cagliari-e-crisi-piena-77490