Pasca de is tres reis marigosa meda po su Castddu ca perdit in domu sua contras su Benevento de Pippo Inzaghi. Sa partida de sa Sardegna Arena acabat 2-1 po is campanus: is sardus ant segnau po primus cun Joao Pedro ma, in segus, su Benevento in d’una pariga de minutus at arrespustu cun Sau e Tuia. Po is piciocus de Di Francesco est sa segunda partida de sighiu perdia in domu: a innantis su Napoli e imoi su Benevento. A nudda est serbiu s’erribu de Nainggolan, e imoi su Casteddu s’agatat sempiri prus acanta de sa zona caglienti de sa classifica.
Su Casteddu fut partiu carrigu e decidiu a binciri sa partida e a pustis pagu tempus iat fatu finas unu gol cun Pavoletti ma s’arbitru Abbatista non si dd’at donau. Su Benevento non abarraiat a castiai. Ma candu Joao Pedro at postu sa bocia a palas de su portieri Montipò sa cosa pariat fata. Sa cuntentesa de is casteddaius est durada finas a s’acabu de su primu tempus, candu prima Sau e duncas Tuia ant bortulau sa partida. In su segundu tempus funt intraus Sottil e Simeone a su postu de Caligara e Tripaldelli ma a ponni atacantis in prus no est serbiu a nudda. Est a nai ca sa fortuna non fut a su costau de is sardus, ca una pariga de bortas ant fatu de totu po torrai a ponni sa partida in paridadi. Candu s’arbitru nc’at bogau de su campu a Nandez (ca dd’iat batiu is manus po ddu pigai in giru) s’est cumprendiu ca non c’iat prus nudda de fairi e difatis aici est andada.
S’allenadori de su Casteddu Di Francesco at chistionau cun is giorronalistas e at nau custus fueddus: “Est sa vida de dogna allenadori cussu de ddu ponni in discussioni. Tocat a pregontai a su presidenti e a is atrus dirigentis, deu facu un’atru trabagliu. Pariat ca sa partida fut andendu beni, fustis gioghendu e bincendu, ma in d’una pariga de minutus ci eus fuliau totu, no est sa prima borta chi sucedit e tocat a trabagliai po fairi cambiai is cosas”.
Sa prossima partida su Casteddu si dda giogat dominigu in Firenze contras de sa scuadra de Prandelli, est un’ocasioni manna po cicai de torrai a postu sa classifica ca is Fiorentinus funt a innanti feti de unu puntu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.ansa.it/sito/notizie/sport/calcio/2021/01/05/calcio-cagliari-con-nainggolan-allassalto-del-benevento_08c4e877-501f-4c78-8353-1efec90062f6.html
