Est sempiri prus de arriolu sa situatzioni in Sindia, bidda chi de una pariga de dis est serrada po su Covid. Cun Sindia s’arriolant finas totu is biddas a su costau po s’erriscu mannu de custa pesta maladita. Is positivus funt bessius de trinta a trinta ses e parit ca custa est sa varianti prus mala de su Covid-19.
Su sindigu Luisu Daga, a pustis airi fueddau cun s’Ats, at donau cumandu a is studentis de is scolas, chi s’agatant massimamenti in Macumere e Bosa, de abarrai in domu. Po totus, sonumancu finas a su 30 de martzu, chi non cambiat nudda, abarrat sa didatica a stesiamentu.
Est prus artu de unu pagu, in su fratempus, su numuru de is positivus in Sardigna, finas chi abarrant a suta de is centu: funt 92 cun atrus dus mortus. Oguali su numuru de chini est in terapia intensvia e abasciau cussu de is atrus aposentus.
Est de 42.724 su numuru de is impestaus a su Covid-19 de candu est cumentzau totu e de tandu si funt fatus 886.127 tamponis. Is mortus funt bessius a 1.200, bintinoi personis s’agatant in is terapias intensivas e 163 in is atrus aposentus de is ispidalis. Cussus chi s’agatant, invecias, incungiaus in domu funt 12.627.
Aici funt dividius in su territoriu is impestaus: 10.484 in sa citadi metropolitana de Casteddu, 6.791 in sa provincia de su Sud Sardegna, 3.534 in Aristanis, 8.424 in sa provincia de Nugoro e 13.491 in cussa de Tatari.
Sa nova bella est ca su Presidenti de sa Regioni Christian Solinas at firmau su cumandu po non fairi intrai a nemus, in s’Isula nostra, in is dis de Pasca Manna. Duncas chini fut giai fendusì su contu de benni de nosu si depit fairi un’atru contu! Sarvu chini tenit arregionis de saludi e de trabagliu totu is atrus ant abarrai in domu insoru. Custa borta, parit, s’est cumprendiu beni cussu chi podiat sussediri e parti giustu aici.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.ilmeteo.it/foto/Sindia/id/9362032-reporter
