“Seus prontus a ponni dinari de sa Regioni po comporai su vacinu e vacinai inderetura totu is sardus”, ddu at nau su presidenti de sa Regioni Christian Solinas, a pustis airi arregodau, eriseru, totu is mortus de sa pesta. S’aministratzioni ghiada de issu, at nau, est pronta a ponni dinari, ma totu depit essiri sighiu de su comissariu. Su problema, narat sempiri Solinas, est a ddus tenni in numuru mannu: “Nosu eus a nai a su Generali Figliuolo: donanoisì cussu chi nosi serbit, e nosu poneus in campu totu cussu chi serbit po vacinai is sardus. Chi nosi ddus mandant seus prontus a ddus fairi a totus a innantis chi intrit s’istadi”. In pissu de is numurus chi bint sa Sardigna urtima po is vacinus fatus Solinas est craru: “Custas classificas non bolint nai nudda, arregodu a totus ca nosu seus alloghendu su 30% de is vacinus po s’atra vacinatzioni a pustis sa prima”.

Sighit sempiri Solinas: “Deu nau ca in s’orrestu de s’Italia tenint sa seguresa ca is vacinus erribint sempiri in is tempus giustus. Nosu, invecias, non podeus erriscai ca seus acapiaus a is navis e a is aparechius. E chi faint adduru? Po cussu tocat a tenni sempiri is vacinus po sa segunda borta!”.

Po su Guvernu in Sardigna funt 150.138 is vacinus fatus, chi est su 65,8% de is 228.150 erribaus in s’Isula.

In su fratempus si chistionat de fairi torrai sa Sardigna in zona colori de arangiu e at essi su Rt de sa cida ch’intrat a decidiri: chi est a pissu de 1 sa Regioni intrat in arangiu chena farta! Mateu Salvini at inderetura fatu sciri ca “Non si depit mancu pensai de fairi torrai a serrai in Sardigna. Totu is numurus funt meglius de a innantis, is ispidalis non funt sunfrendu e feti tres biddas, Madalena, Bono e Sarrocu, funt in zona orrubia. Non si iat cumprendiri a pediri atrus sacrificius a is sardus”.

Sa Pasca Manna est po erribai, sa spera est chi in s’ou non s’agatiti peruna sorpresa legia.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto:   http://www.regione.sardegna.it/regione/presidente/