S’idea chi in Sardigna erribint, po Pasca Manna, de s’orrestu de s’Italia, cussus chi tenint un’atra domu in s’Isula non pragit de seguru a is sardus. Calencunu est movendusì po fairi intendiri sa propria bogi: funt medissimus is post chi si podint ligiri de una pariga de dis in is social, massimamenti in Facebook e in Instagram. Imoi est erribada finas una pregunta online in charge.org po pediri a su presidenti de sa Regioni sarda Christian Solinas de serrai is làcanas po totus. Is nominis de chini pedit ant giai giumpau, de meda est a nai, is duamila.

Sa Valle d’Aosta, de su presidenti Erik Lavevaz, cun d’una ordinantzia ( si podint fairi comenti si ligit in su Dpcm) at giai serrau totu e non fait intrai cussus chi tenint un’atra domu in sa regioni.

“Sa possibilidadi chi de is zonas orrubias si possat erribai in Sardigna, chi po imoi est zona bianca, est unu sbagliu e un’erriscu po sa saludi de totu is sardus. S’esperientzia chi eus tentu s’istadi passada nosi depit imparai calencuna cosa, ma parti chi non siat aici” si ligit in sa pregunta chi andat firmada.

A pustis custus fueddus si cicat finas s’odinantzia fata de Lavevaz e si pedit a su presidenti de sa Regioni “inderetura un’ordinantzia chi frimit is erribus de cussus chi non bivint in Sardigna, chena una arregioni crara o po necessidadi, e lassit obertu feti po chini depit torrai po is parentis”.

Dominigu in is novas de su Guvernu italianu si ligiat ca si podiat moviri in atras domus finas partendu de una zona orrobiu po erribai in zona bianca. Cussu chi est sussediu in Terranoa, aunia genti meda at sartau is controllus e calencunu positivu est agatau finas bufendu in is tzilleris, est arriolendu a totus.

A beru no est serbiu cussu chi est sussediu s’istadi passada? Comenti fut cussa de su molenti sardu?

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: http://icfuae.org.uk/press-releases/changeorg-blocked-uae-after-internet-users-call-skype-ban-be-lifted