C’at pagu de ita nai, sa partida de eriseru cun su Verona, po su Casteddu, fut de binciri. Invecias no est sussediu ca est mancada sa gana e sa barra a is piciocus de Lionardu Semplici. At bintu su Verona e ddu at fatu beni meda, cun su giogu, cun sa cursa e cun sa gana. Dus gol de Barak e de Lasagna erribaus in su segundu tempus in d’una partida cuasi sempiri controllada de is grogus-asulus. Trabagliu mannu meda cussu de s’allenadori Juric, ca cun giogadori pagus connotus e non sempiri de prima pagina est fendu unu campionau de spantu. Ita est sussediu a su Casteddu? Est sussediu ca at atobiau una scuadra prus forti e meglius posta in campu, calencuna borta tocat a nai is cosas comenti funt: su Verona at meritau de binciri! Certu chi Simeone, a pustis su gol de Barak, invecias de ndi boddiri su palu de sa porta, iat fatu gol, sa partida podiat essiri cambiada.

Sa classifica po sa scuadra de Giulini est sempiri peus, ma tocat a nai ca nudda est perdiu ancora: a palas su Parma s’est acostiau de unu puntu e in pissu su Torinu e su Benevento si funt stesiaus ca s’at godangiau unu puntu cussus puru. Feti su Spezia e su Crotone ant perdiu comenti su Casteddu e totu.

S’allenadori de su Casteddu a s’acabu de sa partida at chistionau cun is giornalistas nendu custus fueddus: “Sa scuadra oi at fatu, a parrer miu, una bella partida contras de una scuadra forti de averas chi balit meda. Eus tentu is ocasionis meglius po segnai, e finas a pustis chi fustis perdendu eus erriscau de torrai in partida. Po mei, a dogna manera, sa partida dda eus fata beni, lastima manna a dda airi perdia, ma tocat a pensai a sa partida chi benit. Imoi non tocat a s’arriolai de is scuadras chi depeus atobiai ma depeus pensai feti a nosu chena castiai is atrus. Feti cun su trabagliu nosi podeus sarvai”.

Partida tostada cussa de sa cida chi benit: tocat a andai a Milano po si dda giogai cun s’Inter, e chi sa sorpresa de s’ou bessit a foras una cida in fatu?

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.youtube.com/watch?v=Ohgt9NtGrNg