Sa Natzionali de fubal de s’Italia non ce dda fata a pigai su billetu po is mondialis de su Qatar. Est acabada cun d’unu 0-0 sa partida contras de s’Irlanda de susu, e in su mentris sa Svizzera at bintu po 4-0 cun sa Bulgaria. Duncas cualificada sa Svizzera e s’Italia cundennada a si giogai in su mesi de martzu is “playoff”.
Imoi s’Italia timit ca is arregodus de is atrus mondialis de su 2018 in Russia faint a timiri. Difatis, candu fut Ventura s’allenadori, sa Natzionali asula non ce dda iat fata in is playoff cun sa Svezia.
Massiat marigosu su ct Robertu Mancini: “Soi dispragiu meda poita fut unu gironi chi iaus giai serrau, depiaus essiri a is mondialis giai de duas partiadas o de cenarba passada. Invecias c’eus fuliau cuasi totu”.
Sighit Mancini: “Eus fatu giogu meda, eus tentu sempiri sa bocia, ma non ce dda feus a segnai. Oi depiaus fairi gol inderetura po giogai, a pustis, cun prus trancuillidadi, ma non ce dda eus fata. Isssu funt abarraus totu in palas e non fut facili a agatai s’andala po segnai. Lastima manna, ma depiaus erribai in Belfast cun su billetu po su Qatar giai in buciaca”.
“M’intendu mali candu pensu ca eus tentu sa possibilidadi, massimamenti cun is dus rigoris faddius cun sa Svizzera, de sa cualificatzioni. Pensu ca a su Mondiali ddu eus erribai su matessi. Cumprendu totu, ca in su mundu de su fubal ci soi de una vida, e podit capitai de giogai, giogai finas beni, ma non fairi gol”.
Imoi in martzu su playoff, prus dificili de cussu cun sa Svezia de cuatr’annus a oi, ca ant essi duas partidas contras de duas scuadras diversas, ma po Mancini andat beni su propriu: “Custu merì eus agatau una scuadra chi at giogau in dexi indeannti de su portieri, in martzu est diversu ca chini giogat cun nosu no at essi aici serrau. Abarru cunvintu ca custa est una scuadra forti… e in Qatar eus a giogai po binciri su Mondiali!”.
Màuru Mura
Foto: https://www.tuttocampo.it/Italia/News/1362373/mondiali-in-qatar-si-terranno-in-inverno
