Po dognunu de nosu, massimamenti in is arregodus de candu fustis pipieddus, sa Pasca Manna bolit nai ou de ciocolati. Totu custu de seguru no esistiat a innantis, ca is durcis de sa traditzioni sarda furint, e po fortuna ddu funt imoi puru, atrus: pardulas, tilicas e casadinas prus che a totu. Imoi una grandu protagonista chi non mancat mai in is mesas de is sardus est diventenduru sa Colomba. Ma non cussa industriali chi s’agatat in totu is butegas mannas, nou, sa prus comporada est cussa fata in numurus prus bascius in is pasticerias. Custa de pusti cras est sa de duas Pascas chi eus a fairi incungiaus in domu, ma po sa Confartigianato sarda est prus pagu marigosa de cussa de ocannu passau ca is afaris funt andaus meglius meda.
De cussu chi faint sciri de sa Confartigianato in is mesas sardas ant a erribai non feti durcis ma finas sartitzu, presutu, casu e birra totu fatu in Sardigna.
Est de arregodai ca in s’Isula nosta funt prus de setixentus is impresas chi faint durcis e gelaus, su 70% in manera artigianali, e donant trabagliu a cuasi duamila personis.
Una Pasca cun prus dinari in buciaca si dda minescint de averas ca est genti chi fait sacrificius mannus.
Ma po una bona nova si nd’agatat sempiri unu mala: de unu indagu de su Consortziu de Tutela de is tres Igp (“Agnello di Sardegna”, Abbacchio romano” “Agnello del Centro Italia”) un’angioni in pissu de dus no est sardu ma erribat de sa Romania, de sa Grecia, de sa Spagna o de s’Ungheria. Is angionis erribant in Italia, a pustis viagius longus, cun suferentzias mannas. Est craru ca tocat a chini comporat a donai atentzioni, ligendu beni ita ddu est scritu in s’eticheta, ma bortas meda si castiat feti su pretziu chena donai crobba a sa calidadi.
Po Pasca funt prus de mesu milioni is angionis macellaus e de custus feti su 34% tenint su sinnu de s’Igp.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.ricettedisardegna.it/pardulas/
