Lunis de Pasca in orrubiu po sa Sardigna comenti in totu s’orrestu de s’Italia po mori de sa pesta chi de ocannu passau nos at fatu cambiai sa manera de biviri. Una dì aunia tocat a sighiri is regulas chi su Guvernu de Mariu Draghi nos at cumandau: incungiaus in domu e fait a bessiri feti chi teneus abbisongiu de trabagliai o po cicai meiginas e dotoris.
Sa giustissia controllat mescamente is citadis, is parcus, is spiagias e finas is logus prus connotus aunia, a innantis, s’andaiat a si spassiai. De cras a mengianu cambiat totu, o cuasi, ca sa Sardigna torrat in zona colori de arangiu e s’at a podiri fairi unu pagu de prus. Eus abarrai aici po totu su mesi de arbili, is espertus narant ca in maju at a cambiai totu, tocat feti a tenni passientzia.
In su fratempus is numurus chi eus ligiu eriseru funt ancora de cussus chi arriolant: s’abarrat in pissu de is trexentus e finas sa percentuali de is tamponis fatus cun is positivus nous abarrat in pissu de su 7%.
De ocannu passau a oi in Sardigna si funt amalaidaus de Covid in 46.978, feti eriseru eus tentu 323 impestaus nous e in totu si funt fatus 1.028.036 tamponis. Un’atru mortu, aici seus erribaus a 1.242 in totu, e tres personis in prus in is terapias intensivas (iimoi funt corantunu). De non scaresciri puru is 257 chi funt in is atrus aposentus de is spidalis sardus. Cussus chi, invecias, s’agatant incungiaus in domu funt 15.258.
Is 46.978 chi si funt amalaidaus funt aici dividius in su territoriu sardu: 11.874 in sa Citadi metropolitana de Casteddu, 7.221 in su Sud Sardigna, 3.984 in sa provincia de Aristanis, 9.280 in cussa de Nugoro e 14.619 in sa provincia de Tatari.
In s’orrestu de s’Italia, cun is numurus sardus puru, is impestaus nous de sa dì de Pasca Manna funt 18.025 e is mortus 326, chi po custu bessint a 111.030 de su cumentzu de custa pesta mala chi at postu in genugu totu su mundu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.termolionline.it/news/attualita/1024579/transenne-e-cartellonistica-su-lungomari-spiagge-e-parco-pasqua-e-pasquetta-blindate
