Fradis de Italia non tenidi perunu poderi po aprontai sa mesa regkonali de su centrudestra castienduru a is eletzionis regionalis de su mesi de friargiu benienti. Est custa sa positzioni frima de su Partidu Sardu de Atzioni, chi po custu, non s’at a presentai in s’atobiu chi est stetiu aprontau in su Palatzu Tirsu de sa coordinadora Antonedda Zeda, a pustis sa scrocorigadura po si torrai a candidai de su presidenti Christian Solinas.
Antoni Moro, presidenti de is sardistas, chi fueddat finas a nomini de su segretariu e guvernadori regionali, narat “ca custu est galu de cumpetentzia de su partidu de is bator moriteddus”. E antzis: “Su segretariu est a disponimentu in totu, in calidadi de ghia de sa coalitzioni de centrudestra-civica-sardista po su guvernu de sa Regioni, po si moviri inderetura in s’aprontamentu de s’atobiu de sa coalitzioni”.
Fradis de Italia, sabudu passau, at narau craru-craru de “nou” a sa pensada de torrai a candidai Christian Solinas, chi est sustenniu a dogna manera, de sa Lega de Salvini, poita “non ci funt prus in cunditzionis”. Duncas, s’acordiu cun is concas pensantis de su partidu, sa coordinadora Antonedda Zedda, s’at pigau s’imperiu de “aprontai un’atra mesa sarda de sa coalitzioni”. In s’atobiu de Palatzu Tirso in Casteddu ant essi, invecias, presentis totu is atras fortzas politigas de sa coalitzioni:Fortza Italia, Riformadoris, su Centru Mannu, s’Udc, Idea Sardigna,. Sa Lega, po mori, comenti eus nau, ca sustenit sa candiadura de Christain Solinas non ddue at essiri.
De s’atra parti no est chi is cosas andint meglius, ca sa cuntierra est intru de Arrnatu Soru cun Alisandra Todde. Ma de una e de s’atra parti seus segurus chi s’at a lompiri a una decisioni. Su importu est chi siat in s’interessu de is sardus e non po interessu de is partidus. Eus a benni a biri.
Màuru Mura
Giobia, su 23 de Sant’Andria de su 2023
Foto: https://www.imolaoggi.it/2021/02/27/covid-sardegna-zona-bianca-solinas/
