De unu mesi a-i custa parti dogna borta chi calat in campu su Casteddu perdit. Est giai sussediu in is urtimas cuatru partidas de sa Serie A cun Roma, Napoli, Benevento e Fiorentina. Eriseru, in Bergamo, po non perdiri s’abitùdini, at perdiu sa partida de Coppa Italia cun s’Atalanta de Gasperini. Fut unu Casteddu diversu in is ominis cussu chi at decidiu Di Francesco, chi at fatu giogai cussus giogadoris chi ddu iant fatu pagu in campionau. Vicario, Zappa, Ceppitelli, Walukiewicz, Tripaldelli, Nandez, Marin, Caligara, Tramoni, Pavoletti e Sottil: funt stetius custus is ominis scioberaus de Di Francesco po cumentzai sa partida. In segus, candu is cosas si funt postas mali, s’allenadori beciu de sa Roma at fatu intrai calencunu de-i cussus chi si dda giogant sempiri de titolaris: massimamenti Joao Pedro! De sa partida ant fatu parti finas Pereiro, Lykogiannis, Cerri e Ounas. Po s’Atalanta, chi no at fatu giogai meda titolaris, ant segnau Miranchuk, Muriel e Sutalo, su Casteddu iat torrau a ponni sa partida in is binarius giustus cun Sottil, unu de is pagus chi si dda est batagliendu in totu is partidas.
Candu at acabai de perdiri sa scuadra de sa capitali sarda? A castiai is partidas benidoras “est a si ponni is manus in is pilus”, comenti at nau Di Francesco. Difatis de fatu sa partida cun su Milan de lunis a merì, su Casteddu at a serrai sa prima parti de su campionau in Genova contras sa scuadra de Ballardini, in cussa chi, po imoi, parit una partida chi at a decidiri su trabagliu de Di Francesco.
S’allenadori abrutzesu a sa fini de sa partida at chistionau cun is giorronalistas: “Deu pensu feti a trabagliai, ia bolli donai prus continuidadi a is giogadoris prontus, ma, cumprendu beni, ca su tempus no aspetat. M’est sussediu atras bortas de tenni dificultadis, m’arregodu in Sassuolo, candu c’apu postu tempus meda a costruiri. Imoi is emilianus, gratzias finas a mei, funt crescius, nosu non depeus perdiri fidi ca a innnatis o a pustis at erribai sa gloria e sa fortuna”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://sport.sky.it/calcio/coppa-italia/2021/01/14/atalanta-cagliari-risultato-gol
