S’atra dì su Consigliu de is ministrus at aprovau su Dpcm nou po su Coronavirus. Intru de is atras cosas allonghiat sa cunditzioni de apretu, po sa pesta de Covid-19, finas a su trinta de arbili.
De dominigu metadi de is regionis italianas erriscant de ce dd’acabai in zona de colori arangiu, calencun’atra, comenti sa Lombardia, s’Emilia Romagna e sa Sicilia, erriscat de tenni regulas chi assimbigliant prus a sa zona orrubia. In duda cussu chi at essi po sa Sardigna chi podit essiri intru de zona groga e arangiu. A ponni totu a craru at essi s’Istituto superiore di sanità, a pustis su ministru Speranza at a donai is regulas noas chi ant a balliri de dominigu.
De seguru, a partiri de su 16 de gennargiu finas a su 5 de martzu non s’at a podiri andai de una regioni a s’atra finas chi funt, ambaduas, coloradas de grogu. Comenti de sempiri s’ant a podiri moviri cussus chi depint trabagliai o chi si depint curai. Abarrat su permissu de torrai a sa propriu domu, po totus.
De cussu chi nd’est bessiu a campu, a dogna manera s’at a podiri bessiri de is proprias biddas, chi ddue bivint prus pagu de cincumila personis, finas a si stesiai po trinta chilometrus, ma, a dogna modu, non s’at a podiri intrai in is citadis chi funt provincias.
Parit chi sa regula de fairi moviri, po andai de parentis e amigus, feti duas personis dogna borta, acumpangiaus de unu maschigeddu o una feminedda a suta de is catodixi annus o de unu disabili, bagliat custa borta puru comenti fut po Paschigedda e Annu Nou. Cunfirmada puru s’ordinantzia de non si moviri de domu de is dexi de merì a is cincu de mengianu, comenti puru is ristorantis e is bar obertus finas a is ses in is zonas grogas. Butegas obertas, invecias in is zonas grogas e arangiu. Abarrant serradas is palestras, is piscinas, is tiatrus e fortzis, in zona groga, s’at a torrai a oberri is museus.
Novidadi manna est sa zona bianca. Innoi torrant a oberri palestras, piscinas, tiatrus, cinemas, ristorantis e bar po totu su tempus chi serbit. Ma, po imoi, peruna regioni, cun is numurus de pesta chi tenint, ddue intrat.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
https://www.orizzontescuola.it/nuovo-dpcm-quando-sara-emanato-tutti-gli-ultimi-aggiornamenti/
