Torrat a calai in campu Zoleddu, su fuoriclasse olianesu chi at spantau su mundu de su fubalu, ma non comenti de giogadori o po allenai: si presentat in d’una truma po diventai dirigenti de sa Serie C, cun candidau a presidenti Mateu Marani, giornalista e diretori beciu de una de is rivistas prus famadas de s’Italia: su Guerin Sportivu.
Zola currit paris a su giornalista e chi bincit at a diventai su numuru dus de Marani.
Totu s’at a connosciri su noi de friargiu chi benit, candu is scadruas de sa serie C depint scioberai cussu chi at a pigai su postu de Franciscu Ghirelli (ca s’est dimitiu a innantis de Paschigedda). Po s’ora a curriri po sa cadira prus manna de sa Lega de sa serie C, finas chi mancat s’uficialidadi, iant depiri essiri Marani e Marcel Vulpis, chi de Ghirelli fut su numuru dus. Marani at fatu connosciri su nomini de Zola a calencuna sociedadi de sa C, e in dis chi benint at essi uficializau su nomini de su campioni olianesu. Po Marani su nomini de Zola est de importu mannu, comenti candu si tenit in is manus una carta chi ti fait binciri is partidas. Po Zola iat essi unu torrai in Italia, ca immoi bivit intru de sa Sardigna e Londra.
Su piciocu olianesu, chi at a lompiri is cincuantaset’annus in su mesi de triulas, in prus de s’ammaju de candu fut giogadori, ddu est finas sa connoscentzia manna chi tenit de is categorias prus bascias. Arremonaus ca sa carriera at tentu su cumentzu cun sa maglia de sa Torres de Tatari, a s’acabbu de is annuso tanta. Tandu sa Torres fut allenada de Bebo Leonardi e in segus de Francu Liguori. De Tatari est in segus passau a su Napoli de Maradona, bincendu su scudetu de dus de sa scuadra de sa capitali de sa Campania. A pustis su Napoli at giogau a innantis cun su Parma e dapoi cun su Chelsea, aunia est diventau “magic box” e finas baronetu, titulu chi dd’iat donau sa Reina Elisabeta. A s’acabbu de sa carriera est torrau in terra sarda, agiudendu su Casteddu a torrai in Serie A: unu de is prus mannus chi eus tentu in Sardigna, pagu de eita nai.
Ma immoi Zoleddu est prontu a si ponni a dispositzioni de nou in su fubalu cosa sua.
Màuru Mura
Cenarba, su bintiseti de gennargiu de su 2023
Foto: https://gianlucadimarzio.com/it/zola-intervista-scudetto-inter-news-7-aprile-2022
