In sa prima dì de Presidenti de su Consigliu sa “leader” de Fradis d’Italia, a tentu unu cara a cara, de prus de un’ora, cun Mariu Dradghi.

Unu de is atobius prus longus de sempri, forsis su prus longu, cussu intru de su presidenti chi bessit e cussu, invecias, chi imbucata t precediu eris sa tzerimonia de sa campanedda chi passat de una manu a s’atra. Totu in sa norma. Draghi at chistionau cun sa Meloni de totu is “dossier” chi funt obertus  a partiri de is risurtaus tentus in s’urtimu Consigliu europeu po sa chistioni energetica.

Sa presidenti de su Consigliu est intrada in Palazzo Chigi aunia dd’aspetaiat su pichetu de is Fortzas armadas, Draghi invecias dd’aspetaiat in s’imbucada de sa “Sala dei Galeoni”. De tandu funt abarraus solus a innantis de sa tzerimonia de sa campanedda, chi depiat essiri po is dexi e mesu e, invecias, est addurada de prus de un’ora. Si bit ca is cosas de nai funt paricias. Est finas a nai ca candu Draghi c’est bessiu de Palazzo Chigi sa genti chi ddue trabbagliat dd’at batiu is manus.

Inderetura su primu Consigliu de is ministrus ghiau de Giorgia Meloni po donai is carrigas de numurus dus a Mateu Salvini e Antoni Tajani e fairi Alfredo Mantovano sottosegrretariu de sa Presidentzia de su Consigliu. Sa Meloni at obertu is trabbaglius torrendu gratzias a su presidenti de sa Repubblica Sergiu Mattarella.

S’agenda est prena e Meloni bolit giai serrai a intru de custa cida sa chistioni de is numurus dus de dogna ministerru: “Immoi inderetura a trabbagliai”, at postu in twitter, a pustis airi giurau presentendu sa scuadra de guvernu chi “cun orgogliu e responsabilidadi manna at a serbiri su Stadu”.

“Depeus essiri totus de una parti po is emergentzias chi s’Italia tenit in denanti”, at nau sa Presidenti, in su primu Cdm, chi est durau, prus o mancu, una mesoredda.

 

 

Màuru Mura

 

 

 

Lunis, su 24 de Santu Aine de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.agenzianova.com/news/primo-cdm-per-il-governo-meloni-la-presidente-apre-la-riunione-ringraziando-sergio-mattarella/