Unu butegheri at provau a nce ddu stupai, invecias issu at bintu poita fut in regula e poita is casteddaius, chi furint passilendu, ddu ant difendiu.

Seus in via Manno, in Casteddu, orruga famada de totu is sardus chi connscint Casteddu po is butegas de bestiris, crapitas e atras milli cosas. Ddu est unu piciocu spagnolu, Jacob Gonzales ddi narant, chi est sonendu su violinu. Sa genti ddu castiat e ddu ascurtat spantada ca cun is didus arregalat majas.  Jacob est apretziau de genti meda e dogna acabu de cida sonat in is orrugas de sa capitali sarda. Sonat unu pagu de totu e passat de is classicus comenti Bach e Mozart a sa musica pop, chena problema perunu.

Sonat Jacob e sa genti si frimat po dd’arregalai unu pagu de dinari, ma non pragit a totu sa genti chi intendit cussa musica galana chi bessit de su violinu. Una buteghera de s’orruga no agradessit e ddu cumbidat, non connosceus is fueddus chi at umperau, a si ponni de un’atra parti. Ddu amelessat de tzerriai is carabineris. No est feti un’amelessu, e difatis erribant is carabineris. Su sonadori non fait peruna resistentzia e antzis, po cussu chi at contau sa genti chi fut a ingiriu, at cumentzau a arretirai is cosas suas. Ma totu sa genti s’est posta de sa parti de su piciocu spagnolu e sempiri in numuru prus artu, massimamenti candu funt lompius is carabineris, chi, est a nai, no ant fatu nudda chi non nai calencuna cosa a s’origa de Jacob. A pustis si funt arretiraus lassendudeddu inigui a sighiri a sonai. Sa genti at cumentzau a batiri is manus e su dinari chi beniat postu in terra non fut feti in moneta ma mudaiat in dinari in paperi!

Ddue fut, intru de sa genti, finas unu predi, Don Arremundu Mameli, chi, in segus at scritu in facebook calencunu fueddu: “Issu est su violinista Jacob Gonzales, sonat beni meda. Cussu chi at tzerriau is carabineris po ddu fairi stesiai si depit bregungiai. Bravus is carabineris ca cun cosa beni fata ddu ant fatu sighiri”.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.minube.it/posto-preferito/via-giuseppe-manno-a71311