Is trabagliadoris pubricus e privaus, ma finas chini trabagliat po consu su, ant a depiri fairi biri su paperi birdi, donau a pustis su vacinu po binciri su Covid, o, po chini non ddu tenit s’arresurtau de su tamponi po intrai a trabagliai.

Si timint, po custu, morrungius mannus finas in Sardigna. In Casteddu, in sa prassa Carmine, indenanti de sa Prefetura, ddu at essi una manifestada de sa Fisi (Federazione Italiana Sindacati Intercategoriali), cun sa presentzia de su Movimento Partite Iva.

Erriscu mannu finas po is trasportus. Po nai, funt prus o mancu in centu is autistas de s’Arst chi no ant fatu su vacinu e chi duncas, chi non si faint su tamponi, non ant a podiri trabagliai. Est su 5% de totu is autistas de s’Arst. Est unu problema chi pertocat massimamenti s’Ogliastra.

Su Cumunu de Casteddu at aprontau, de lunis chi benit, in sa statzioni de prassa Matteotti is tamponis chena de pagai: “Est un’oportunidadi, at nau su sindigu Truzzu, po chini non si podit vacinai e finas po chini at scioberau de non ddu fairi”.

In su fratempus un’atru mortu e atrus corantanoi impestaus nous a su Covid in s’Isula nosta in is urtimas binticuatr’oras. Est cussu chi narat su bulletinu regionali sardu donau de sa Regioni, comenti dogna dì. Su mortu est una femina de sessantases annus chi biviat in sa provincia de Aristanis.

Is malaidus de Covid chi s’agatant in is terapias intensivas funt sempiri dexi e cussus, chi invecias, funt in is atrus aposentus de is spidalis crescint de dus e imoi funt setantanoi. In millicincuxentuscorantases funt incungiaus in domu.

De dixianoi mesis seus arriolaus, sa vida est mudada po genti meda, ma ancora sa gherra no est binta, finas chi si bit sa lugi in fundu. Un’atru pagu de passientzia e eus a torrai a biviri cun prus pragu arriolu e prus fidi in su benidori.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://24live.it/2021/10/14/green-pass-obbligatorio-dal-15-ottobre-tutte-le-regole-per-lavoratori-pubblici-e-privati/