Poita su Vaticanu, a pustis corant’annus at decidiu de torrai a oberri un’indagu in pissu de Emanuela Orlandi? Est una pregunta chi si funt ponendu in medas?

“Po s’ora apu ligiu feti in is giornalis. Est lompia ca non si ddu aspetiaus, non eus tentu sa possibilidadi de cumprendiri comenti si est erribaus a custa decisioni”, at nau Perdu Orlandi, fradi de Emanuela. Sa nova lompit a pagas dis de sa morti de su Paba beciu Benedetto XVI e is cosas scritas in su libburu “Nient’altro che la verità. La mia vita al fianco di Benedetto XVI” imprentau de sa Piemme e scritu de Padre Georg, su segretariu de Ratzinger. In is paginas de su libburu, Padre Georg, si dda pigat cun Paba Bergoglio, incurpendudeddu de airi “segau in dus su coru” de Ratzinger. “Boleus beni a Deus e non a is egoismus” at nau Franciscu in sa missa de su ses de gennargiu. Calencunu in custus fueddus at ligiu un’arrespusta a is polemicas.

Non funt cuntentus meda cussus chi bolint chi sa Cresia abarrit aici coment’est de is scioberus de Bergoglio, chi funt bistus tropu progressistas. E chi aintru de su Vaticanu si fueddat a bogi bascia e, s’unu cun s’atru, si castiant a mirada trota, is arrespustas lompint in manera pubrica po chini tenit interessus: “Sa ciaciarrada est un’arma chi bocit: bocit s’amori, bocit sa sociedadi, bocit su essiri fradis – at nau Paba Franciscu dominigu passau in s’Angelus –. Deus oi discienti de s’amori de Gesù Cristu o unu discienti de sa ciaciarrada chi non cumpartzit?”.

Cras Emanuela Orlandi iat airi lompiu is 55 annus de vida. Candu est sparessia, su 22 de làmpads de su 1983, ndi teniat feti cuindixi. Biviat cun sa familia in su Stadu Vaticanu, aunia pariat impossibili, sonumancu a s’aparentzia, chi podiat sussediri calencuna cosa de legiu.

Su torrai a oberri custu indagu, de parti de sa magistradura vaticana, lompit in d’una ora delicada meda, aunia est pesendusindi una cuntierra: is traditzionalistas iant a bolli chi Paba Franciscu si pongiat a un’ala.

Ma eita c’intrant is cuntierras po su poderi intru de duas partis cun sa chistoni Orlandi? Poita custas duas chistionis si currint una cun s’atra? De averas s’agatat sa volontadi de lompiri a sa beridadi e donai arrespustas seguras a sa familia de sa picioca?

S’indagu nou – intru de atras cosas – iat depiri finas a acrariri su poita Erricu De Pedis, Capu mannu de sa Banda de sa Magliana, est interrau in sa Basilica de Sant’Apollinare. Emanuela – tocat a ddu arregodai – andaiat in sa scola de musica de sa matessi prassa de sa Basilica. Sa magistradura at a acrariri is relatas chi ddue funt intru de De Pedis, is ominis mannus de su Vaticanu, is “servizi segreti” e sa politiga? Relatas chi, finas a immoi, funt galu cun umbras mannas e abarrant mudas.

 

 

Màuru Mura

 

 

Cenarba, su trexi de làmpadas de su 2023

 

 

Foto: https://it.wikipedia.org/wiki/Sparizione_di_Emanuela_Orlandi