A is eletzionis regionalis chi ant a lompiri in Sardigna, sa Lega de Salvini s’at a presentai cun su simbulu su in totu is otu collegius de s’Isula: “Ndi eus chistionaus giobia passada paris a su segretariu Mateu Salvini, chi at a erribai in Sardigna a intru de unu mesi, de seguru a innantis de s’acabu de lampadas”.
Ddu at nau su segretariu regionali de sa Lega in Sardigna Migheli Pais, ca est finas su presidenti de su Consigliu Regionali. Insoma, est unu chi contat meda in sa politiga regionali. S’atra dì, in Aristanis, at atobiau consiglieris e assessoris regionalis, aministradoris de citadis e biddas, cordinadoris, citadinus e militantis po pigai decisionis de importu e apariciai is pensadas de su partidu po immoi e crasi. Est cunvintu meda Pais e in conca sua tenit una cunvintzioni: “Non soi presumiu, ma soi seguru ca oi sa Lega est su progetu politigu meglius po chini si bolit impignai in s’aministratzioni publica. Nemus tenit is pensadas nostas”.
Su presidenti de su Consigliu regionali, ponendu a un’ala custus bestiris e ponendusì sa camisa de partidu fueddat de s’atobiu comenti: “Unu giustu tempus politigu, una galana e oberta fueddada chi amostat sa determinatzioni de piciocus, piciocas, ominis e feminas chi funt motivaus e creint in su progetu de Mateu Salvini. Seus totu genti chi bolint ponni fortza a is arreiginis de sa presentzia de sa Lega in Sardigna. Sa spera est chi is numurus chi eus tentu in is passadas regionalis siant finas de prus. Tocat a arremonai ca in terra sarda seus su primu partidu de sa coalitzioni de guvernu regionali”.
Po Migheli Pais sa Lega in Sardigna: “Depit essiri unu partidu popolari, de su meritu, obertu a totu cussus chi bolint donai una manu de agiudu, de sa genti comuna chi trabagliat e chi pedint arrespustas chi siant realis. Seus protatonistas de su guvernu de sa Regioni e depeus torrai a essiri protagonistas apetotu, abarrendu, comenti eus sempiri fatu, in mesu a sa genti”.
Màuru Mura
Mercuris, su binticuatru de maju de su 2023
Foto: https://www.facebook.com/leganordsardegna/
