Sabudu e dominigu s’indagu de sa Regioni “Sardi e sicuri”, cun s’agiudu de Ares-Ats e cun is Cumunus, erribat in sa parti arta de sa Sardigna. Is biddas cumpudadas ant essi cussas de su tataresu: Tatari, Sossu, Sènnaru, Ossi, Usini, Tissi, Itiri, Casteddu Sardu, Viddaècia, Zelgu, Osile, Uri, Nujvi, Valledòria e Cuzina. Prus o mancu ant essi in sexentus cussus chi ant a trabagliai intru de dotoris, inferimieris, tecnicus e volontarius. In Zelgu s’indagu est feti de dominigu. Chini bolit fairi su tamponi, chi arregodaus est chena de pagai, ddu at a podiri fairi de is otu e mesu de mengianu finas a sa una e de is duas a is ses de merì. Serbit feti sa tessera sanitaria e su numuru de telefunu po arretirai s’arresurtau.

In su mentres in Sardigna is novas chi erribant de is numurus de is urtimus bulletinus studiaus de sa Fondazione Gimbe non funt po nudda bonas. In is cidas passadas is positivus funt crescius de su 55 po centu e oi odit erribai sa nova de su mudamentu de sa zona in arangiu ai cussa orrubia cun is regulas meda prus tostadas po totus.

De su 31 de martzu a su ses de arbili eus tentu in Sardigna 983 positivus dogan centumila abitantis e sa Fondazione Gimbe at scritu in d’una nota: “Chi po cussu chi pertocat s’Italia sa percentuali de is casus est in calu in atras cuatru regionis, invecias, est bessendu, massimamenti in Sardigna e in Sicilia aunia sa creschida giumpat su cincuanta po centu. Cun is positivus nous si ndi pesat finas sa percentuali de is letus umperaus in is ispidalis, siat in is terapias intensivas (de su 23%) e siat in is atrus aposentus (su 19%)”.

Una befa manna po totu is sardus a passai in d’una pariga de cidas a essiri sa sola in zona bianca e de lunis a mudai in cussa orrubia cun feti atras tres regionis! Andat beni ca s’orroscentzia de custu virus est manna, ma depeus cicai de imparai a biviri cun is regulas craras beni, ca feti aici ndi podeus bessiri.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.aslsassari.it/index.php?xsl=7&s=73006&v=2&c=34