“Unu Paba chi fut a su costau de sa genti, de is urtimus de sa sociedadi. Intendu a intru unu dolu mannu po sa morti de Paba Franciscu”.

Intru de is pimus a fueddai de sa morti de Franciscu de Unu, est Alissandra Todde, sa presidenti de sa Regioni Sardigna chi, in dd’unu paperi, amostat “a nomini de sa Regioni una tristura manna po sa morti de unu Paba a su cali fustis totus acapiaus, finas po s’acostamentu de issu cun Csteddu, aunia at bofiu lompiri po sa bisita uficiali sua, po sa relata cun sa Madonna de Bonaria, chi at donau su nomini a sa citadi aunia est nasciu, est a nai Buenos Aires”.

Una morti chi lassat su mundu prus poburu, ponit in evidentzia sempiri su paperi de sa Todde, “poita s’est moviu, massimamenti, in sa cica de sa pagi, de sa solidariedadi intru de is populus e de sa giustissia, chena donai crobba a is làcanas geograficas e politigas”. “Una craresa – sighit sa presidenti de sa Giunta Regionali – chi ddu at portau a s’atumbai, prus de una bia, contras de is meris de su mundu, comenti est sussediu de pagu po is contus intru de Israele e sa Palestina o intru de is relatas de gherra intru de s’Ucraina e sa Russia. Ma custu feti po nai de is urtimas chistionai. A nau sa sua intru finas de su lompimentu in Europa de is imigraus, amostendusì in Lampedusa, s’otu de triulas de su 2013, a pagu tretu de candu est bessiu in su pumu chi fut de Perdu. Cun sa morti de Bergoglio si stesiant sa pagi e sa solidariedadi intru de is ominis e, invecias, s’amostat unu mundu prenu de odiu e de guerra”.

“A nomini de su Consigliu Regionali, e miu personali, amostaus su dolu mannu chi nos est lompiu po sa morti de su Paba”, aici, invecias su presidenti de su Consigliu regionali Pieru Comandini. “Franciscu fut unu a su cali si castiaiant totu is catolicus, ma non solu. Massimamenti ddu castiaiant is poburus e sa genti chi sunfrit. Oi si nd’andat un’omini de valori mannu chi at sempiri gherrau po sa pagi in su mundu e po biviri amostendusì totu ogualis”.

 

 

 

 

Màuru Mura

 

 

 

 

 

Lunis, su bintunu de arbili de su 2025

 

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

 

Foto: https://www.chiesadicagliari.it/2014/09/15/il-libro-sulla-visita-di-papa-francesco-a-cagliari/