Una litara cun d’una cartucia e su sinnu anarchicu “A” scritu in d’unu fogliu de paperi est lompiu a su procuradori generali de Torinu Franciscu Saluzzo chi, cun su pubricu ministeru Paulu Scafi, sustenit s’acusa, in su processu a sa Corte D’assise d’Appello de Torinu, contras de s’anarchicu Alfredu Cospito – chi s’agatat in su presoni sassaresu de Bancali cun su articulu 41 bis. Saluzzo cun Scafi ant pediu sa cundenna a su presoni a vida e un’annu chena podiri biri a nemus po mori de s’atentau a sa scola de carabineris de Fossano, in sa provincia de Cuneo, de su 2005.
Po sa cumpangia de Cospito, Anna Beniamino, is dus ant pediu sa cundenna po bintiset’annus e unu mesi de presoni. Unu mesi a immoi sa Corte d’Assise d’Appello de Torinu at decidiu de mandai totu sa documentatzioni a sa Corte Costituzionale. S’indagu est de sa Digos de Torinu agiudada de sa Procura de Milano.
In su mentris, intelletualis e genti de cresia funt calaus in campu cun sa pregunta a su ministru de sa Giustissia e a totu su Guvernu poita “bessant de s’indiferentzia chi andat a innantis de pariciu tempus” e po “unu signali de umanidadi e coragiu” in is cunfrontis de Cospito, “chi est morendusì” po mori ca non papat de otanta dis. Sa pregunta est cussa de ddu fairi bessiri de su 41 bis, su presoni prus tostau, chi Cospito est fendu de su 4 de maju passau in su presoni sassareu e chi est a s’origini de nono pigai peruna cosa de papai. Cospito at perdiu trintacincu chilus.
Is firmas arregortas, po immoi, fun tuna corantina. A su costau de su presidenti “emerito” de sa Corte Costitutzionali e ministru de sa Giustissia passau, Giuanni Maria Flick, s’agatant Gherardu Colombo, magistrau famau de sa procura de Milanu a su tempus de “Mani Pulite” e oi presidenti de sa Garzanti Libri, su filosufu de su diritu de su filosufu Luisu Ferrajoli, su presidenti de s’unione delle Camere penali Giuannidominigu Caiazza e medas magistraus in pensioni comenti Beniaminu Deidda, Dominigu Gallo, Nello Rossi, Liviu Pepino, Francu Ippolito. Intru de is intelletualis e de sa genti de cresia agataus Massimo Cacciari, Moni Ovadia, Luisu Ciotti e Alex Zanotelli.
Màuru Mura
Lunis, su noi de gennargiu de su 2023
Foto: https://www.romatoday.it/cronaca/anarchici-presidio-manifestazione-roma-31-dicembre-2022.html
