At perdiu in manera legia, su Casteddu de Fabiu Pisacane, eris a pustis prangiu contras de su Pisa. Partida nascia mali e acabbada peus. Difatis, is pisanus, ant cumandau sa partida giai de su cumentzu, passengu in vantagiu cun dd’unu tiru de is undixi metrus de su centravanti toscanu Moreo. Rigori po su Pisa donau de s’arbitru, po mori de una scofada de peis de Sulemana a Calabresi. Cun sa partida in bessida, is piciocus de su Casteddu, ant cicau de paregiai sa partida. E pariat finas signali bonu candu s’arbitru La Penna, de sa setzioni de Roma, c’at stupau a Durosinmi po airi scutu a Mina, chi est unu provocheri. Mancaiat giai un’ora de giogai undixi contras de dexi. E invecias est sussediu cussu chi nemus s’aspetaiat. Cun dd’un’omini in prus e cun totu sa parti de duas chi si depiat ancora giogai, is casteddaius ant pigau atrus dus gol: ambos de su capitau toscanu Caracciolo. Cun sa partida posta de aici Pisacane s’at giogau sa carta de Pavoletti, s’acacanti chi est nasciu in Livorno. E Pavoletti non s’est fatu pregai fendu su gol de su 3-1 e amostendu cun dus bidus de sa manu sa litara L, po indicu de sa citadi de aunia lompit. Mancaiant ancora prus de binti minutus a s’acabbu de sa partida e si podiat cicai de dda torrai a ponni in peis. Invecias nudda de nudda, e candu La Penna c’at stupau finas a Obert s’est cumprendiu ca sa partida fut bella che acabbada.
Su Casteddu, po immoi, a dogna manera no est postu mali in classifica, ca tenit trinta puntus e aspetat sa partida intru de Cremonese e Fiorentina po biri is puntus in prus de sa tertz’ultima. Chi bincit sa Fiorentina ant essi ses e mali chi andat (est a nai chi bincit sa Cremonese) ant essi cincu de sa matessi scuadra toscana.
Cenarba at a lompiri in Sardigna su Napoli de Conte, un’ocasioni manna po is casteddaius po si ndi torrai a pesai.
Foto: https://www.youtube.com/watch?v=52oHlNea_-g
