Parteus de ua seguresa: giogai cun s’Inter de ocannu est dificili po totus e pensai de fairi puntus est ancora prus dificili. Non depit fairi a timiri sa classifica (imoi funt cincu is puntus de su Torinu de Davidi Nicola) ca, chini sighit su fubal, nd’at bidu de dogna colori. Ci funt ancora otu partidas e, duncas, binticuatru puntus de si giogai e giai bincendu sa partida de sabudu chi benit cun su Parma si podit acostiai su Torinu e totu, ca tenit una partida dificili meda cun sa Roma, e calencun’atra scuadra chi imoi parit trancuilla. Sa partida de eriseru is piciocus de Semplici dd’ant giogada comenti depiant fairi e, a unu certu puntu, pariat ca ndi podiant torrai in Sardigna sonumancu cun d’unu puntu. Darmian, su tertzinu de s’Inter, at orrovinau totu fendu su gol chi at donau un’atru ocodeddeddu de scudetu a sa scuadra de Antoni Conte. Lastima manna ca podiat essiri unu puntu prenu de milli signalis, ma depint abarrai in conca e in is ogus sa gana de is giogadoris chi ndi bolint bessiri a foras de custa classifica legia. Feti cun su trabagliu e, imoi, chena castiai cun chini si giogat su Casteddu podit fairi cussu chi a is ogus de totus est cuasi unu miraculu: tocat a ci creiri totu paris, de su presidenti a s’urtimu giogadori!
S’allenadori Lionardu Semplici at chistionau a s’acabu de sa partida cun is giornalistas nendu custus fueddus: “Lastima manna po airi perdiu, giai sciaus de agatai un’Inter forti, ma m’est pragiu comenti eus giogau custa partida. Eus arrespustu beni e ndi podiaus pigai finas unu puntu. Cun custa gana e custa barra podeus tenni fidi manna e cicai de nosi sarvai, castiendu a nosu e no a is atrus. Est de arregodai ca su Casteddu, a su cumentzu de su campionau, no iat pensau de s’agatai cun custa classifica e po custu imoi est prus dificili. Tocat a ndi tirai a foras calencuna cosa de prus de cussu chi seus donendu imoi”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.raisport.rai.it/video/2021/04/calcio-serie-a-sintesi-inter-cagliari-1224e0f0-a760-481b-81f5-42178f91fa86.html
