Sabudu est acabau su campionau de su Casteddu. Una partida chi non serbiat a meda cussa cun su Genoa, chi non po fairi giogai calencunu giogadori chi no ddu iat fatu in totu s’annu. Partida perdia, sa de dixianoi ocannu, po 1-0, ma cussu chi contaiat fut a si spassiai e fairi spassiai is tifosus.

Campionau legiu, legiu de averas cussu de su Casteddu ma, a sa fini, s’est sarvau e custu est chi balit e contat. Feti noi is partidas bintas, dexi cussas acabbadas cun d’unu paregiu e dixianoi, comenti eus giai nau, is perdias. A unu centu puntu pariat a beru ca sa serie B aspetaiat feti is piciocus de Semplici ma de sa partida, in Casteddu, cun su Parma totu est mudau.

Imoi tocat a progetai su campionau de ocannu chi benit e sa prima cosa de fairi, a innantis de totu, est cussa de decidiri su nomini de s’allenadori. In d’unu mundu giustu e sabiu de custu non iat tocai mancu a ci pensai: Semplici, po arreconoscentzia ma non feti, depit essiri s’omini chi depit ponni in motu sa macchina de su Castteddu. Ma gai ddu scieus beni ca su mundu de su fubal medas bortas no est sabiu meda e tocat a s’aspetai de totu. Semplici est erribau candu totu pariat de ci scavulai, at postu ordini e trabagliau meda in sa conca de is giogadoris, imoi iat tocai a ddi donai una possibilidadi. In is giornalis, massimamenti cussus sportivus, si chistionat de atrus nominis e prus che a totu de cussu de Juric, eus a benni a biri cussu chi at a fairi su presidenti Giulini.

Sa spera de totu is tifosus est cussa de non torrai a biviri unu campionau che custu e chi sa Sardigna, sonumancu in su fubal, non sunfrat prus e facat feti spassiai.

Is tifosus, non connoscendu is contus, ant bestiu a festa, cun is coloris orrubius e asulusu, sa statua de Carlo Felice, a parrer nostu non funt cosas de fairi ca cuss’omini e cussa genia non funt amigus de sa Sardigna. A si biri meglius a su campionau chi benit!

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.filomagazine.it/2020/04/limportanza-di-essere-semplici/