Tres annus funt passaus de cussu 25 de maju de su 2018 candu Pàulu Pillonca, su diretori nostu, at lassau custa terra. Tres annus chi parint una dì! Manna est s’arrasta chi nos at lassau e manna est s’andala chi, candu fut biu, nos at amostau. Seus cichendu in dogna manera de portai a innanti cuss’andaledda e in donnia chi depeus fairi calencuna cosa nosi pregontaus: “Iat essi de acordiu?”. Su spetu nostu est cussu de non traigiri e po imoi ce dda seus fendu! Prus che su trabagliu mannu chi nos at lassau, in pissu de is poetas a bolu, o de totu is libburus chi at scritu cun sabidoria, est un’atra s’eredidadi chi nos at trasmitiu. Cussa de fairi is cosas non feti po ci godangiai, cussa de su rispetu de su trabagliu de totus, s’amori po sa genti chi trabagliat in su sartu, massaius e pastoris massimamenti, e cussa de tenni fidi a su fueddu donau e a sa strinta de manu. Seus segurus ca totu custu est a intru de nosu!
Pàulu Pillonca fut unu meri de su fueddu, sa pinna dda sciat umperai beni comenti unu maistu e dogna cosa chi at scritu est de importu mannu po totus.
Arregodaus is libburus chi ddi ant donau fama e gloria: Sardegna segreta, Narat su diciu, Chent’annos, Làras, Remundu Piras, Il silenzio la parola, Pepe Sozu, Remundu Piras cun su cd, Frantziscu Sale, Juanninu Fadda, Bore Poddighe, L’Isola del cuore, Abbas de terra, Màncarias – la parlata di Seui, Antonandria, Sedas lizeras, Madre terra nonna luna, Il bandito senza colpa, Opera Omnia di Remundu Piras, Barore Sassu, Antigone, Limba Nida, Aiace, Samuele Stochino, Beberè, O bella Musa, ve sei tu?.
Non ddu scaresceus mai, comenti seus segurus chi in biddas medas de sa Sardigna s’intendit sa mancantzia de cust’omini bonu e amigu de totus. Teniat un’amigu de coru in dogna bidda sarda e seus stetius testimongius de sa genti chi ddu aspetaiat comenti chi fessit una prenda. Ddu fut a beru una prenda, po nosu, po sa familia sua, po is amigus e po dognunu chi intraiat in cunfidentzia cun issu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
