Acabbu marigosu po su Casteddu chi perdit in sa Unipol Arena po 2-3 cun sa Fiorentina. Unu rigori a su minutu de 102 serrat su campionau de sa scuadra sarda.
Si cumentzat cun is lambrigas de Ranieri, festau de totu su stadiu, po s’urtima bia setziu in sa panchina de su Casteddu.
Castiaus unu pagu comenti est andada sa partida. Casteddu cun Viola a palas de Lapadula e Luvumbo po cicai de ddus agiudai, in su mentris chi in difesa ddu est Obert, a su postu de su scualificau Dossena, a su costau de Mina. Fiorentina giai cun sa conca a sa finali de Conference, ma est sa matessi scuadra toscana a si fairi perigulosa cun dd’unu corpu de conca de Belotti aciapau de Scuffet. Su Casteddu arrespundit cun dd’una filera de ocasionis: a innantis unu corpu de conca de Deiola artu de pagu, a pustis una parada de spantu de Terraciano de unu tiru de Luvumbo e dapoi ancora unu corpu de conca de su matessi capitanu Deiola. A s’acabbu de sa parti de unu est sa Fiorentina a fairi gol cun Bonaventura.
In sa parti de dus si torrat a partiri cun is matessis ominis in campu e cun Deiola chi a innantis s’acostiat a su gol e dapoi ddu fait cun dd’unu bellu corpu de conca. S’acabbu est spantosu: su giovunu zambianu Kingstone, imbucau a su postu de Luvumbo, fait gol cun dd’unu tiru de foras de s’area, ma a pustis cuatru minutus Nico Gonzales agatat su paregiu. A su minutu de 45 Lapadula segnat ma est foras de giogu. Is sa parti in prus de is noranta minutus, a su minutu de 101, s’arbitru in segus de s’essiri relatau cun su Var, donat unu rigore po sa Fiorentina chi Arthur ponit a is palas de Aresti, chi in s’ora iat pigau su postu de Scuffet.
Sa partida acabbat aici 2-3, ma su Casteddu abarrat in Serie A. Custu fut cussu chi contaiat a s’acabbu de is contus! Immoi tocat a fairi una scuadra noa po non sunfriri comenti de ocannu.
Màuru Mura
Cenarba, su binticuatru de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=fP5nHal2suI
