“Su cenarba o su sabudu a merì bufaia alcol meda cantu si ndi bufat in d’una cida intrea. Non po mi spassiai ma poita cicaia de atacai su dolu chi tenia a intru. Calencuna borta pigaia finas droga po intendiri de mancu”
Funt is fueddus chi at umperau Harry, su figliu de Carrulu de Inghilterra e nebodi de sa Regina Elisabeta chi funt a intru de unu documentariu “The me cant’t you see”, chi de oi si podit biri in Apple Tv.
Harry torrat a chistionai, custa borta cun Oprah Winfrey, a pustis chi in is cidas passadas iat fueddau meda. Cussu chi si bit est ca su piciocu at sunfriu meda de averas. “Su tempus peus estu cussu chi apu biviu de is bintotu a is trintadus annus. Ma totu est nasciu candus est morta mamma mia in su 1997”, narat sempiri Harry.
Fueddus chi de seguru no ant a pragiri a is parentis sus, ma no est sa prima borta chi Harry narat comenti dda pensat e, est de arregodai, ca su piciocu at arrennegau su “status reale”. De seguru, cussu chi at nau, no at a fairi prageri a sa familia de is Windsor.
Harry giai iat nau, in su tempus passau, ca si nd’est andau in California po acabai de sunfriri e sa cosa non fut pragia meda a su babbu, Carrulu, rei de su benidori. Ma su piciocu no est chi siat torrau a palas de cussu chi at fatu, antzis at sempiri nau “ca boliat cambiai po s’amori de is figlius”. Est intrau finas in terapia, at fatu sciri, poita Meghan at cumprendiu cantu fut arrabiau.
Harry est de sempiri connotu po sa rebellia sua in sa familia, at donau de ita fueddai a is giornalis e a sa genti po sa manera pagu “reali” de biviri e, prus che a totu in contus de piciocas, ca fut unu conca maca. A unu certu puntu de sa vida sua però si nd’est andau finas in guerra in Afghanistan, in su 2007 e 2008, finas a candu totus ant scipiu ca fut inigui e nde ddu ant fatu torrau de pressi po seguresa sua e de is collegas chi teniat a su costau.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto:https://it.wikipedia.org/wiki/Henry,_duca_di_Sussex#/media/File:Ceremony_of_Welcome_for_TRH_The_Duke_(cropped).jpg
