Atacanti lestru e piticheddu, chi si moviat meda e chi sciat giogai cun is cumpangius, annomingiau Spadino, Francu Selvaggi, nasciu in Pomarico su 15 de maju de su 1953, est unu de is bintidus chi at bintu su mondiali de fubal de su 1982 in Spagna. Ddu at fatu cun sa maglia de su Casteddu in pissu, finas chi, est a nai, in Spagna no at giogau mancu unu minutu.

Perdu Vierchovod, unu chi de atacantis ndi cumprendit meda, at sempiri nau ca Selvaggi est cussu chi ddu at fatu “sunfriri” de prus: “Mi faiat girai sa conca, non ddu aciapaia mai”.

Erribat in Casteddu in su 1979, bofiu de Gigi Riva, chi tandu fut dirigenti. Is sardus is tres annus a innanti ddus iant passaus in Serie B e Selvaggi ddu iant scioberau po fairi su centravanti. Erribaiat de su Taranto e prima iat giogau cun sa Ternana e cun sa Roma, ma, a nai sa beridadi, feti po duas partidas.

Su primu campionau de Selvaggi est spantosu: fait 12 gol e erribat cuartu in sa classifica de chini segnaiat de prus, a palas de Bettega, Altobelli e Pàulu Rossi. Abarrat atrus dus annus, gioghendu 85 partidas e fendu 28 gol, in Sardigna e lassat arregodus de grandu giogadori e is tifosus arregodant galu cussus ominis chi andaiant de sa maglia numuru 7 a cussa numuru 11: Bellini, Quagliozzi, Selvaggi, Marchetti Piras. In s’istadi de su 1982 passat a su Torinu, chi fut cichendu de torrai mannu a pustis una pariga de annus legiteddus, e innoi abarrat po atrus dus annus. Giogat, a pustis, cun s’Udinese, s’Inter e sa Sambenedettese.

Cun sa Natzionali de Bearzot at giogau tres bortas in su 1981 cun Germania Est, Bulgaria e Grecia. In su 1982 Bearzot ddu tzerriat po ddu portai in Spagna e, finas non gioghendu, est serbiu meda po su naturali chi teniat in sa truma italiana.

Carriera de giogadori chi balit meda cussa de Selvaggi, aici non si podit nai cussa de allenadori chi at cumentzau in su 1992 cun su Catanzaro.

 

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

 

Foto: https://omniafootball.it/franco-selvaggi-il-campione-dimenticato/