Su Casteddu bincit cun s’Olbia in Aritzo in d’una partida chi serbit po preparai su campionau de Serie A chi cumentzat in custu mesi de austu. Biancu in su primu tempus e Ceter cun Marin in su segundu funt cussus chi ant fatu gol.

Lionardu Semplici est cuntentu: “Mi interessaiat meda biri is giogadoris chi finas a imoi iant giogau de mancu, narat Semplici, ddis bolia donai minutus in is cambas po ddus agatai prontus. Custas funt partidas chi serbint po nosi fairi cresciri e po sighiri su trabagliu chi feus in is allenamentus. Eus giogau beni, su portieri insoru est stetiu bravu meda, ma non castiu po nudda is gol chi eus fatu o chi eus bintu o perdiu, cicu feti de fairi cumprendiri a sa scuadra ca depit sempiri giogai po binciri is parcidas o sonumancu ddue depit provai. Ancora depeus trabagliai meda e teneus sempiri cosa de fairi, Boleus partiri beni in Coppa Italia e a pustis in Campionau. Depeus tenni sa gana e sa barra de fairi sempiri sa partida, comenti ocannu passau calencuna borta ce dda podeus fairi, atras no, ca tocat a tenni in conca ca totu is scuadras funt aprontadas po si dda giogai. Una cosa, a dogna manera, depit essiri crara a totus: su Casteddu depit tenni un’identidadi. Est a nai ca a su Presidenti Giulini apu pediu a innantis ominis e feti a pustis giogadoris, in campu est de tenni in conca ca ddue funt is atras scuadras, torru a nai, ma totu paris e cun sa calidadi de is ominis podeus giumpai totu is dificoltadis”.

Chistionendu de giogadoris Semplici at nau ca: “In pissu de Godin e Nandez decidit sa sociedadi. Ocannu podit essiri cussu de unu giogadori chi tenit virtudis mannas comenti de omini e comenti de giogadori, soi chistionendu de Gaston Pereiro. Ocannu passau non ddi est girada beni, ma sa spera est chi, cussu chi depeus cumentzai, ddu biat protagonista”.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.romagiallorossa.it/notizie-as-roma/semplici-la-roma-non-ci-sottovalutera-nainggolan-ci-manchera.html