“Chini no at fatu su vacinu est perigulosu po is atrus e no est agradessiu a intru de cresia”. Custu fut scritu in su cartellu apicau in su portali de sa cresia de Santu Pàulu, in denanti de su Cumunu, in Casale Monferrato. Ddu iat apicau su preidi, Don Pàulu Busto, e su matessi ddu at bogau, a pustis is morrungius. S’imagini de su cartellu, a dogan manera, in pagu tempus at fatu su giru de is social. Cuasi in duxentus ddu ant amostau a su sindigu Fideli Riboldi, chi est de sempiri a favori de su vacinu e non ddu mandat a nai, ma chi po custu contu est abarrau in is suas. Totus narant ca forsis Don Busto at esagerau, ma funt in medas, invecias chi ddi ant batiu is manus.

Don Pàulu est su retori de sa cresia e finas su diretori de su giornali de sa Diocesi, Vita Casalese, chi bessit una borta a sa cida, unu de is gioranlis prus ligius in sa citadi. De custus foglius at sempiri nau sa sua po su vacinu e si dd’at pigada cun is no-vax, prus de una borta.

Su 15 de triulas passau iat scritu s’editoriali umperendu, prus o mancu, is matessis fueddus chi at postu in su cartellu: “Siat crara una cosa: chini no est vacinau erriscat sa saludi, ma custus funt afaris sus, ma mascamente cussa de is atrus – at scritu. Non podint e non depint”. In su matessi articulu Don Pàulu pediat chi cussus chi non si bolint vacinai, chi s’amalaidant de su Covid, si paghint is spesas.

Su preidi at depiu bogai su cartellu, a dogna manera, po sighiri is regulas de sa Cei chi at nau ca, imoi chi serbit su Green Pass po intrai in ristorantis, palestras e atrus logus in su serrau, po intrai a cresia non c’est bisongiu. Abarrat sa regula de si ponni sa mascherina, su stesiamentu e a non si donai sa manu po su sinnu de sa pagi.

At sau sa sua finas su piscamu Giuanni Sacchi: “Sa cartellu de Don Pàulu non ci boliat bogai a nemus ma fut una difesa po sa genti becia chi andat a cresia”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.tripadvisor.it/Attraction_Review-g194712-d12391897-Reviews-Chiesa_di_San_Paolo-Casale_Monferrato_Province_of_Alessandria_Piedmont.html