Est nova noa e mala: oi est mortu Giorgio Oppi. Fut ricoverau in su spidali Brotzu de Casteddu de unu bonu pagu de tempus. Teniat otantadus annus, ca fut nasciu in Igresias s’otu de friargiu de su 1940. In is cidas passadas fut intrau in su spidali “Santissima Trinità” po una pancreatite.
Sa saludi de Oppi a su cumentzu pariat giai seria ma sempiri oguali, de fatu s’est intendiu sempiri peus e po cussu est intrau a innantis in su spidali de Is Mirrionis e a pustis in su Brotzu aunia pag’ora fait s’est arrendiu. Cun sa morti de Oppi acabbat una pagina de importu mannu po sa politiga de sa Sardigna.
At cumentzau sa carriera sua in sa Democrazia Cristiana, e in segus a su sciusciamentu de custa est intrau a innantis in su CCD e in segus in s’Unioni de Centru. Est intrau in consigliu Regionali po sa prima borta, comenti de consiglieri in su 1979, cun sa DC. In is Regionalis de s’otantacuatru intrat ancora comenti de consiglieri e ddue abarrat finas a su 1989, candu sa Democratzia Cristiana, po is indagus de su pool de Milano de “Mani Pulite”, si sciusciat passat, comenti eus giai nau, a su Centro Cristiano Democratico e cun custus si torrat a presentai a is regionalis de su 1994. Mancu nau boliat ca ce dda fait a si torrai a setziri in su palatzu de via Roma! Comenti mancu nau bolit ca ce dda fait in is regionalis de su 1999 e cussas de su 2004.
Si giogat sa carta finas po is politigas de su 2006 e ce dda fait a si setziri finas in Montecitorio, lassendu, comenti sa lei bolit, su incarrigu de Consiglieri Regionali. In Montecitorio intrat finas in eletzionis politigas de su 2008
De fatu torrat in consigliu regionali in su 2009 in is listas de Unione de Centru e fait s’assessori in Giunta de sa Difesa dell’Ambiente. Pariat ca non ci podiat essiri unu consigliu Regionali chena cust’omini, medas bortas ciaciarrau, ma sempiri a dispositzioni de totus, invecias de cras at essi aici. Est de averas s’acabbu de un’era e at mancai in aula s’abilesa de su politigu iglesienti.
A sa familia, e a is amigus de su partidu, is passientzias prus mannas.
Màuru Mura
26 de triulas de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://it.wikipedia.org/wiki/Giorgio_Oppi
