Eriseru si funt serraus is gironis de is Europeus de fubal chi si funt gioghendu in custu mesi de làmpadas. Partidas po corus fortis eriseru, massimamenti cussas giogadas a is noi oras: Portogallo-Francia e Germania-Ungheria. Su meritu prus mannu est stetiu de is ungheresus chi ant poderau beni sa fortza de sa scuadra tedesca e antzis funt bincendu finas a candu mancaiant ses minutus a s’acabu de sa partida.

Imoi si passat a is otavus e custas funt is scuadras chi si funt cualificadas: Italia, Belgio, Francia, Spagna, Inghilterra, Olanda, Galles, Portogallo, Croazia, Austria, Svizzera, Ucraina, Germania, Svezia, Repubblica Ceca e Danimarca.

Is partidas chi de sabudu s’ant a giogai invecias funt custas: Belgio-Portogallo, Italia-Austria, Francia-Svizzera, Croazia-Spagna, Svezia-Ucraina, Inghilterra-Germania, Olanda-Repubblica Ceca, Galles-Danimarca.

Is primus a calai in campu funt is italianus cun is austriacus (una borta ddu faiant in guerra, mancumali ca imoi est feti po unu palloni). Fiducia meda s’intendit in totu s’ambienti italianu, a pustis is primas tres partids giogadas. S’Austria parit una scuadra chi si podit binciri chena problemas, ma tocat a donai sempiri crobba manna e giogai comenti chi funt is meglius de su mundu.

Chi si bincit cun is austriacus is piciocus de Mancini s’ant a giogai is cuartus cun sa scuadra chi bessit bincidora de sa partida Belgio-Portogallo. Cussa de partida giai at essi tostada, ca su Belgio est una de is scuadras meglius chi si funt bistas finas a imoi e su Portogallo tenit giogadoris fortis, finas chi po imoi no est pragia meda.

A pustis is gironis is tifosus tenint ancora prus fiducia, forsis prus finas de is asulus e de Mancini e totu: mancuna scuadra at giogau beni comenti at fatu s’Italia, mancu sa Francia, chi tenti is favoris de totus.

 

 

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://footballwhispers.com/it/blog/pronostico-italia-austria/