A pustis de binti dis in zona orrubia Aritzo bessit de s’incungiamentu. Ddu at decidiu su comissariu de su Cumunu Antoni Monni. Sa prima ordinantzia fut de su ses de lampadas finas a su cuindixi, ma candu s’est bidu ca non fut serbiu a meda si fut decidiu de allonghiai su incungiamentu finas a eriseru.
“Apu chistionau cun is dirigentis de sa Assl de Nugoro e apu scipiu ca sa situatzioni est mudada de meda – at nau Monni-. Imoi funt feti in cuatru is impestastaus, ma custus acabant cras sa cuarantena. Depu nai ca is aritzesus funt stetius bravus de averas, ant tentu rispetu mannu po is regulas de sa zona orrubia, est a nai ca totu sa bidda nd’at sunfriu. De oi, duncas, torraus a partiri ma deu depu sempiri avertiri sa genti: donai ancora atentzioni e sighei a sighiri is cumandus. Su virus, cun totu is variantis chi seus intendedu, est sempiri a su costau nostu. Feti sighendu is regulas e su vacinu podeus abarrai prus trancuillus”.
In Sardigna, chi est zona bianca de su 31 de maju e zona birdi europea de su 18 de làmpadas, imoi arriolat feti sa bidda de Trinità d’Agultu, a pustis is cunidixi impestaus de sa varianti Delta. Impestu chi, aici si narat, depit essiri partiu de su set de su film Disney “La Sirenetta”.
Su bulletinu regionali de eriseru fueddaiat de atrus 16 impestaus ma nemancu unu mortu. Imoi in totu, de friargiu 2020 sa Sardigna contat 57.162 impestaus e 1.489 mortus. S’agatant in is aposentus de is spidalis corantadus personis e “feti” cincu funt in terapia intensiva. In domu, incungaius, po sa cuarantena, funt in 2.330. Is sanaus, in totu, funt erribaus a 53.296.
Is impestaus funt aici dividius in su territoriu regionali: 14.973 in sa citadi metropolitana de Casteddu, 8.685 in su Sud Sardigna, 5.165 in sa provincia de Aristanis, 10.964 in cussa de Nugoro e 17.361 in sa provinca de Tatari.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Aritzo
