Tragedia manna in su noti in sa linia ferroviaria intru de Milanu e Torinu, in Brandizzo, a prus o mancu de unu chilometru de sa statzioni in diretzioni de sa capitali de su Piemonti. Unu trenu at postu a suta una truma de operaius: si contant cincu mortus e dus chi, ppo bonasorti, funt abarraus bius. Su machinista est sciocau, a pustis chi is dotoris ddu ant bisitau e mandau a domus sua.
De cantu si connoscit de su indagu de is carabineris, su trenu teniat a palas una duzina de vagoni e fut currendu a centusessanta chilometrus a s’ora e is operaius, chi trabagliaiant po un’azienda de Borgo Vercelli, funt impignaus po trabaglius de mudamentu de calencunu metru de binarius.
In su logu aunia est sussediu funt trabagliendu po connosciri sa beridadi sa politzia de is ferrovias e is carabineris de Chivasso, ghiaus de sa procura de Ivrea, difatis si ddue agatat finas su pubricu ministeru Giulia Nicodemi. Po succurriri si funt movias ambulanzas medas e is vigilis de su fogu.
Is mortus funt Kevin Laganà de bintidus annus chi erribaiat de Messina, ma biviat in Vercelli; Michael Zanera piciocu de trintacuatr’annus de Vercelli; Giusepu Sorvillo de corantatres annus, lompiat de Capua ma biviat in Brandizzo; Giusepu Saveriu Lombardo, nasciu in Marsala in Sicilia ma chi de annus biviat in Vercelli e Giusepu Aversa, su prus beciu, de corantanoi annus de Chivasso.
“RFI est in dolu mannu po cantu sussediu e s’acostiat a is familias de is operaius mortus”, si ligit in d’unu scritu de sa Rete Ferroviaria Italiana.
“De novas chi apu tentu de is operaius chi s’agataiant in su logu, parit chi ci siant stetius problemas de comunicatzioni intru de sa scuadra chi s’agataiat inigui e chini depiat coordinai is trabaglius. Ma at essi sa magistradura a fairi craresa po cussu chi est sussediu”, at nau Paulu Bodoni, chi est su sindigu de Brandizzo. Chi, in segus, at aciuntu: “Su pensamentu nostu oi est po is familias de is piciocus mortus, custa est una tragedia manna po totu sa comunidadi de Brandizzo”.
Màuru Mura
Giobia, su 31 de austu de su 2023
Foto: https://www.ilfattoquotidiano.it/2023/08/31/incidente-ferroviario-treno-brandizzo-5-operai-morti/7277081/
