Totu is piciocus, piciocheddus e pipius acabant is vacantzas su 13 de cabidanni ca sa dì infatu cumentzat s’annu scolasticu. Ddu at decidiu sa Giunta Regionali sarda segundu s’indicu chi at donau s’assessori a sa Pubrica Istrutzoni Andria Biancareddu.

Is letzionis, po totus, ant acabai s’otu de làmpadas, foras de is pipieddus de sa scola de s’infantzia chi ant andai, comenti de sempiri, finas a su 30 de làmpadas e totu.

Custus funt is indicus de sa Regioni, ma dapoi, dogna scola podit decidiri de partiri finas prima de su 14 ca si dda giogant cun is dis acapiadas a is festas.

In totu, duncas, is dis de scola ant essi duxentus e cincu, chi calant a duxentus e tres ca dogna scola tenit duas dis chi podit umperai comenti disigliat. S’at a serrai sa scola po totu is festas: dogna dominigu, s’otu de mesi de Idas, su binticincu e su bintises, po Paschigedda e Santu Stevini, su primu de gennargiu, su ses de gennargiu e su lunis a pustis Pasca Manna. In prus su primu de maju po sa festa de is trabagliadoris, su dus de làmpadas festai sa Repubblica e po sa festa de su santu de dogna bidda.

Po is studentis is vacantzas de Paschigedda cumentzant su 23 de mesi de Idas e si serrant su 5 de gennargiu. Vacantzas de carrasecare sa dì a innanti de su cumentzu de sa Quaresima e cussas de Pasca Manna, chi calat su 17 de arbili, de su 14 a su 19 de arbili. In Sardigna sa scola serrat finas su 28 de arbili po sa festa de  sa Sardigna.

Funt duas is speras de babbus. mammas e professoris massimamenti: sa prima est cussa de tenni giai a su cumentzu totu is profesoris a dispositzioni e sa segunda est chi sa pesta, chi in is urtimus dus annus at decidiu tropu, si frimit e chi sa didatica a sa stesiada diventit feti un’arregodu, de tristura giai, ma sempiri e solu un’arregodu.

Ancora est acoitu po ci pensai, piciocus, spassiaosì ancora po dus mesis… cun is regulas!

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.atpesercizio.it/popupPP.php?idPP=1597