“Ia bolli arregodai a Alissandra Todde ca a essiri presidenti de sa Regioni no est a fairi sa ‘cheerleader’ de is amigus politigus sus, ma de rapresentai e sustenni totu is cumunus sardus, chena peruna distintzioni de coloris o bandeals”.
No est moddi Ugo Cappellacci, chi est stetiu guvernadori issu etotu e immoi est deputau de Fortza Italia, candu chistionat de Todde chi s’atra dì s’est amostada in su Consigliu Comunali de Casteddu po batiri is manus a su primu atobiu de Massimu Zedda.
“In fueddus de sa Todde, cun is calis narat ca at decidiu de agiudai Casteddu feti poita est a su costau politigamenti cun su sindigu, nosi lassant spantaus. At essi una faddina o forsis non connoscit su garbu istitutzionali?”, si pregontat Cappellacci. Chi, dapoi, sighit: “Unu presidenti de Regioni non si podit ponni a una parti o a s’atra, feti aici podit trabbagliai beni. Donai ciafus, comenti ant fatu is assessoris sus a is sindigus chi non funt de sa parti insoru, o donai carignus a is cumpangius de sa coalitzioni insoru no est feti una faddina, ma ddu at s’erriscu de parri essiri guvernaus de diletantis”.
A difendiri su sceberu de Alissandra Todde est su senadori de su partidu Democratigu Marcu Meloni: “Seus chena de fueddus. Bogliu arregodai a Cappellacci ca a su costau de sa presidenti Todde s’agataiant, in prus de calencunu parlamentari, su rapresentanti de su guvernu, su prefetu de Casteddu, su retori de s’Universidadi, su presidenti de s’Autoridadi portuali e atrus medas chi, cumbidaus ma non podiant lompiri, ant fatu erribai fueddus de augurius comenti s’Arcipiscamu de Casteddu Mons. Baturi e su sindigu beciu Floris”.
Sempiri po Meloni: “Cappellacci iat airi fatu beni a si citiri e depiat fairi is scusas po no ddu essiri e a dogna manera torrai gratzias a sa presidenti po s’oni fatu”.
Màuru Mura
Giobia, s’undixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2024/02/26/sardegna-grandi-citta-a-todde-truzzu-tiene-fortini-del-centrodestra_2b898a6d-9a11-4e3c-96bb-844387f2aac3.html
