Su impestamentu de sa varianti Delta est crescendu e si depit fairi calencuna cosa de importu po cicai de dda fairi abasciai. Non si chiostionat né de mesuras noas e nemancu de incungiamentu: seus in su prenu de s’istadi e parit lastima manna. Antzis, su guvernu e is regionis funt pensendu de mudai is mesuras po ciciai de non fairi intrai perunu logu in zona groga. Parit ca una de is cosas chi si possat umperai est su green pass. Ma non a sa manera francesa, ma a cussa italiana. Parit puru ca cun su decretu de su guvernu, chi est po erribai, su pass s’at a donai feti a cussus chi ant fatu totu e dus is vacinus.
Su Cts, chi at a cumentzai de chistionai de custu lunis o martis, pensat chi “abisongiat a donai importu mannu a su green pass”. Su pensamentu est cussu de fairi obrigu po viagiai in trenu o in aereu, po intrai in is stadius, po sighiri calechisiat manifestada, ma finas po ristorantis, palestras e piscinas a su serrau. Po chini non sighint custas regulas si pensat a fairi serrai is atividadis po cincu dìs cun multas de cuatrucentu eurus.
Sa magiorantzia de guvernu non dda pensat totu a sa matessi manera, po custu, tra una chistioni e un’atra, s’est cichendu de erribai a una solutzioni chi acuntentit a totus.
Su Covid in Sardigna sighit a tenni numurus spantosus, a pustis chi po una bona pariga de cidas pariat postu a un’ala. Eriseru su bulletinu regionali fueddaiat de 190 impestaus nous, cincuanta in prus de sa dì a innantis. Bessint a cincuantases is ricoveraus in is spidalis e cuatru funt cussus chi s’agatant in is terapias intensivas. SA nova bella est ca non ci funt mortus e in undixi funt sanaus.
In su territoriu is impestaus nous funt aici dividius: 104 in sa citadi metropolitana de Casteddu, 51 in sa provincia de su Sud Sardigna, 2 in cussa de Aristanis, 3 in sa provincia nugoresa e trinta in cussa tataresa.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.paginegialle.it/magazine/viaggi/green-pass-italia-14089
