Tres regionis de s’Italia erriscant de torrai in zona groga, a dogna manera non de custu lunis. Est cantu narant is regulas noas chi tenit contu de is impestaus e is vacinaus in dogna regioni. Sa cica est de s’Alta Scuola di Economia e Management dei Sistemi Sanitari dell’Università Cattolica, campus di Roma.

Oi, narat custa cica, sa regioni chi erriscat de prus est sa Sardigna sighia de sa Sicilia e de su Veneto. A pustis erribant su Lazio, sa Campania, su Piemonti e sa Liguria. Sa regioni, invecias, cun prus pagus erriscus est sa Valle d’Aosta, chi est finas s’urtima a essiri intrada in zona arva. A is palas de custa agataus sa Basilicata, sa provincia de Trento e sa Puglia.

De lunis mancuna de custas intrat in zona groga, ma po custa cica sa Sardigna tenit su 72% de possibilidadis de intrai, un’atra borta, in zona groga de lunis, sa Sicilia su 53% e su Veneto su 45%.

De custa possibilidadi sa Regioni sarda giai ddu scit e po custu at pediu de cambiai is mesuras, cumpudendu non feti chini ci bivit, ma totu sa genti chi erribat in s’istadi.

In su fratempus funt crescendu is impestaus nous, eriseru su bulletinu regionali chistionaiat de centucoranta in prus de sa dì innanti. Est a nai ca ocannu passau, in su matessi mesi de triulas, funt meda prus pagus. Sa nova bona, ca tocat a cicai sempiri cussa, est ca is mortus abarrant frimus a 1.494.

58.053 est su numuru de totu cussus chi si funt picigau su covid de su mesi de friargiu de su 2020 e 55.160 cussus chi, invecias, funt sanaus. In is spidalis si ddue agatant in 46 e de custus tres funt in terapia intensiva. Funt in 1.353 is incungiaus in domu e in su territoriu totu sa genti chi s’est ammalaidada est aici dividia: 15.431 in sa citadi metropolitana de Casteddu, 8.842 in sa provincia de su sud Sardigna, 5.213 in sa provincia de Aristanis, 10.980 in Nugoro e provincia e 17.573 in sa provincia de Tatari.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.corriere.it/salute/malattie_infettive/21_giugno_22/variante-delta-covid-cosa-sappiamo-f3ca8a20-d268-11eb-9207-8df97caf9553.shtml