“Depeus abarrai paris totu custu acabu de cida, teneus sabudu a merì e totu sa di de dominigu po nosu. Allirgu ses Totorè?”, ddi scrit in Whatsapp Pepi a su figliu. S’arrespusta non addurat a lompiri: “Ihhh ta bella nova, soi allirgu che una Pasca. A propositu ses giai donendu una mirada a s’ou chi depis comporai?” “Eh giai no at essi obrigu!”, ddi arrespundit brullendu Pepi. “Mi ca soi passendu a ti ndi liai – sighit Pepi – faidì agatai prontu: a is ses de merì soi a suta de domu”. Totoreddu ddu scit beni ca Pepi s’inchietat chi no lompit a s’ora decidia e si cingidi alletru-allestru!

“Tandu Totoreddu, ti ses fatu totu belligeddu, e custu berreteddu asulu, de aunia ndi bessit?”, narat Pepi. “Aici mi fais arriolai, non ti dd’arregodas ca mi ddu at donau Fideli, germaneddu miu, sa cida passada?”.

Pepi est in pensamentu, po passai duas dis paris tocat a fairi progetus po non fairi orrosciri a Totoreddu, ma de dogna arriolu nde ddu leat su pipiu e totu: “Babbu ddu scis ita bogliu fairi custu acabbu de cida?”. S’apilurtzat Pepi, cumentzat a pensai de depiri pigai sa machina e andai a calencunu logu atesu, de depiri girai po butegas,in citadi, po agatai bestiris, o peus ancora in calencunu centru cumerciali a perdiri tempus. Invecias Totoreddu ddu spantat: “Non bogliu fairi nudda, mancu a mi samunai sa faci. Passaus duas dis intru de divanu e letu e nosi ndi pesaus feti po papai e bufai. Ita ndi naras?”. Pepi est spantau: “Eja, mi pragit meda, perou mi depis impromintiri ca sonumancu is dentis ti ddu samunas!”. Su merì cumentzat allonghiendu su divanu po tenni prus logu po si sterrinai e sighit castiendu su Guiness de is records chi sa pardina, non Ervidedda, ma Margarita, dd’iat arregalau. Est curiosu Totoreddu e bolit connosciri is cosas prus strambas: s’omini prus artu, sa femina prus bascia, chini est prus lestru cun su “cubo di Rubrik”, chini tenit is peis prus longus, is pilus, is ungas. Ddu spassiat. Ma est a nai ca fintzas Pepi ddu sighit cun passioni manna e cun sa matessi curiosidadi. De su “Guiness” si passat a castiai unu film: “Ma non sciu chi ti pragiat, e a innantis de ddu biri ti depu contai sa parti de unu ca custa est sa de duas. Ti nd’arregodas cuss’atra borta chi fustis a solus e nos iaus bidu Nemo? Ti fus dromiu e sorruschias che unu porcededdu… ah … ah!”. “Non t’arriolis, oi ddu apa castiai cun atentzioni prus manna e chi mi pigat su sonnu pigamì a ciafus!”.

“Feus una cosa – ddi torrat Totoreddu – dogna dexi minutus frimaus su film e nosi imbrassaus comenti dus pipius, aici chi non ce dda feus a ddu acabbai ddu eus a fairi cras a mengianu”. A Pepi non ddi pariat beru, e s’acordiu tra babbu e figliu fut fatu chena farta.

Oiomomia su film, cantu de prus banali ci possat essiri, ma babbu e figliu dogna dexi minutus, comenti de acordiu, si frimaiant po s’imbrassai a sa strinta. Si naraiant fueddus durcis e faiant progetus po su benidori. “Bogliu fairi su pintadori de mannu o un’arti chi permitat de diventai erricu meda”, ddi naraiat Totoreddu. Pepi a cuss’origa non ci boliat intendiri: “Tui depis fairi un’arti chi ti permitat, dogna dì, de trabagliai comenti chi sias ghioghendu, ma ddu podis fairi depis ponni sa conca in su libburu e studiai sempiri. Est feti cussu su caminu”.

“Studiai, studiai e ancora studiai, ma non tenis atra cosa de nai?”, morrungiaiat Totoreddu. “Est sa cosa prus de importu mannu chi depis fairi in sa vida, non m’ap’a mai orrosciri de ti ddu nai”, Duncas prima ti ddu ponis in conca e prima ddu as a cumprendiri!”.

Mancu mali ca Totoreddu biora de is dexi cumentzat a cascai po su sonnu e Pepi nd’aprofitat po ddu portai a letu: “Eja, tengiu sonnu andaus a letu e cras acabaus de castiai su film”.

Pepi ddu castiaiat in su mentris chi si serraiant is oghigeddus: non creu chi siat mai stada pintada cosa prus bella.

Totoreddu dromit imbrassada totu su noti cun cun su babbu comenti non fut mai sussediu, una manu intru su sugu e s’atra a faci. Mai noti est stetia prus galana po Pepi.

Su dominigu infatu si ndi pesant pasasus e a pustis airi smurzau si ci torrant a crocai in su divanu, Totoreddu bolit amostai totu cussu chi at imparau cun su gogu de “Piggy il maianlino” e “Cotton Tower”, ma sempiri donendu una mirada a s’ora ca a una certa ora Pepi depit contoniai. Erribat cuss’ora e sa tristura bincit cun s’allirghia. Legiu, meda legiu, su viagiu de torrada de Pepi.

 

 

8 arbili de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://galleria.acolore.com/la-casa/la-camera/ora-di-andare-a-dormire-pintado-por–1119601.html