Sa poesia de Lucio Dalla chi torrat a biviri cun sa bogi de Damianu David, sa scarriga de vida de Bianca Balli, sa bestimenta de Cristianu Malgioglio, sa comicidadi de nino Frassica. Sa dì de duas de Sanremo passat aici ancora prus coidendu.
Perun’atra cosa chi non cantzonis e aici sa partida de is Propostas Noas partit inderetura: passant in finali Alex Wyse cun Rockstar e Settembre cun Vertebre. Custu merì is arresurtaus totu. Nudda de fairi po is feminas in cuncursu: Vale Lp e Lil Jolie, chi donant unu messagiu contras de sa violentzia in pissu de is feminas, pesendudendi dus cartellus cun sa scrita “Chi deu non bogliu, tui non podis” e Maria Tomba, bestìa cun su pigiama e cun dd’unu messagiu craru: “Castiamì is ogus e non is titas”.
Inderetura lompit s’ora de Bianca Balti, mama e guerriera. “Non soi erribada a fairi sa malaida, ma a fueddai de vida”, iat nau atobiendu is giornalistas. Aici est sussediu: sa Balti bestit unu bestiri meglius de s’atru, erriendu cun gratzia, sa conca spinniada po mori de sa chemio e amostat is arrastas in pissu de corpu chena problema.
Tocat, in segus, a Malgioglio: “Est aici bellu a essiri innoi, in cincuant’annus de trabbagliu, in sa cali apu tentu sa bona sorti de trabbagliai cun is prus mannus, non sciu chi est un’arregalu. Forsis po totu cussu chi apu fatu mi ddu minescia”.
Sa gara: in pissu de palcu torrant a cantai is cuindixi “Mannus”, chi podiant pigai sa metadi de votus de su publicu in domu e s’atra metadi de sa Giuria de is Arradius. Is cantzonis, giai intendias sa dì a innantis, non donant a su merì perunu spantu.
Sa classifica de is primus cincu, comenti de s’atra dì: Giorgia est sa de unu, sighia de Simoni Cristicchi, Achille Lauro, Luciu Corsi e, imbucau de nou cunforma a sa dì de unu, Fedez. totu at addruai finas a sabudu a noti candu eus a connosciri su bincidori.
Màuru Mura
Giobia, su trexi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.corriere.it/spettacoli/festival-sanremo/25_febbraio_12/scaletta-sanremo-2025-seconda-serata-1c62eef6-0b62-4ee3-a6ec-b8b734d3bxlk.shtml
