“Po ndi pesai una scuadra comenti nosi dda pensaus, is fueddus chi depeus ponni indenanti de totus funt: trabbagliu, identidadi e vida de scuadra”. Aici Fàbiu Pisacane, in dd’unu videu amostau in is canalis social de su Casteddu. Fueddus chi lompint de sa Val Camonica, aunia is giogadoris de su Casteddu ant cumentzau a trabbagliai po su campionau 2025-2026. E at finas nau: “Famini, intensidadi, coru e orgogliu, is valoris chi sprigant su Casteddu. Serbit, a parrer miu, una scuadra chi gioghit curtza, chi ce dda feus nosi ndi podeus tirai cosas bellas. M’ant donau una oportunidadi manna e mi dda bogliu giogai. Intendu una responsabilidadi manna, massimamenti po sa citadi chi m’at donau meda e deu ddi bogliu donai ateretanti”.
In su mentris at chistionau finas Davidi Nicola, s’allenadori beciu de su Casteddu, chi at agatau trabbalgiu nou cun sa Cremonese: “Cun su Casteddu nosi seus lassaus beni. Eus chistionau cun su presidenti Tomasu Giulini e nosi ndi seus acataus de tenni pensadas chi non cumpartziant. Candu est de aici, meglius meda a essiri ominis e stagliai is caminus de fairi. Immoi tocat a scriri sa storia de sa Cremonese po cantu pertocat sa Serie A. Tengiu arregionis medas po andai a innanti e soi cuntentu po duas prus che a totu: sa umiltadi manna cun sa cali m’ant cicau e s’amostu de una realtadi chi connoscia feti de foras ma no ia mai testau de su a intru. Innoi s’agatant struturas, ideas e potentzialidadis chi funt fraigadas de tempus e is professionistas chi trabbagliant ddu faint beni meda. Cussu chi nos’eus a giogai at essi unu campionau dificili comenti de sempiri. Po immoi a sa sociedadi apu pediu de non tocai nudda, poita bogliu connosciri cussu chi mi podint donai is giogadoris, is segus eus a biri aunia at a tocai a intervenni”.
Màuru Mura
Lunis su catodixi de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.tuttomercatoweb.com/serie-a/cagliari-si-comincia-a-lavorare-per-la-nuova-era-fabio-pisacane-2118118
