In su caminu de sa familia, Jacopo Pazzini, passau de sa Fiorentina a su Casteddu, torrat in is arrastas chi at lassau su bisaju de parti de mama, Mariu Baldini: “Est stetiu su primu giogadori de fubalu a segnai unu gol cun sa maglia de sa Fiorentina, in su 1926”, contat su giogadori nou de mesucampu de su Casteddu in s’atobiu cun is giornalistas, “e a pustis, comenti m’at contau mama mai, est passau a s uCasteddu. Unu seculu in segus deu soi fendu su matessi caminu”.

Fazzini, dapoi, sighit a nai: Soi innoi poita su Casteddu, cun su diretori sportivu Accardi e s’allenadori Pisacane, m’ant bofiui chena si ponni peruna duda. Mi soi ambientau inderetura e mi possu permitiri de nai, giai de immoi, ca su sceberu miu est giustu. Soi allirgu meda de m’agatai innoi e non biu s’ora de cumentzai a giogai e amostai cussu chi soi capassu de fairi”.

Su giogadori nou, fueddat de comenti s’agatat meglius in campu: “Cicu de fairi totu cussu chi si depit sciri fairi in mesu de su campu. Inigui in mesu at essi bellu a si passai sa bocia unu cun s’atru, ma ddu depeus fairi non feti po bellesa, ma po cicai de fairi gol. E, bistu chi non eus a poderai sempiri sa bocia, depeus essiri ancora prus bravus a cuberai su palloni. Massimamenti po custu seus trabbagliendu cun s’allenadori e s’orrestu de sa scuadra.

Fubalu, ma non feti po su piciocu toscanu: “A pustis airi acabbau su Liceu mi soi scritu in s’Universidadi online, in su cursu de scentzias motorias, e ocannu passau mi soi laureau in sa triennali. Sa familia mia cun mimi, de su cumentzu, est stetia crara bastanti giai de candu fui piticu: a innantis su studiu e in segus, po prageri, su fubalu”.

 

Jacopo Fazzini est nasciu in Massa su 16 de martzu de su 2003 e at giogau sa prima partida in Serie A, candu iat fatu giai 19 annus, su 15 de austu de su 2022, imbuchendu in campu in is minutus de s’acabbu de sa partida binta po 1-0 contras de su Spetzia. Su primu gol ddu fait in sa partida perdia in domu cun su Sassuolo po 3-4 e su 10 de austu de s’annu benienti fait dus gol in Coppa Italia agiudendu aici s’Empoli a binciri po 4-1 cun su Catanzaru. Cun is asulus toscanus, in totu, bestit sa maglia po 76 bias fendu seti gol.

Passat a sa Fiornentina ocannu passau e giogat in totu binti partidas.

 

 

 

 

Foto: https://www.youtube.com/watch?v=sJ_aE-Wio5k