A pustis airi perdiu, de sighiu, cun Roma, Napoli, Benevento, Fiorentina e Milan eriseru su Casteddu ddu at fatu finas cun su Genoa de Ballardini. Ndi funt torraus chena de puntus is piciocus de Di Francesco, ma custa borta si dd’ant gherrada cun barra e gana. Ballardini e totu, chistionendu cun is giornalistas, at nau ca “su Casteddu pagu c’intrat cun sa lota po non ci calai in Serie B e ca a sa fini su valori de sa scuadra at a benniri a campu”. Sa classifica est dogna cida peus, e non podit essiri diversamenti: custu dominigu su Casteddu ddu at sighiu su Torino de Nicola, s’allenadori nou bofiu de su presidenti Cairo. Si funt stesiadas Udinese e Genoa e a suta de sa scuadra de Giulini s’agatant feti su Parma e su Crotone.

Cun cust’atra partida perdia prus de unu tifosu s’aspetaiat su cambiu de allenadori, invecias su presidenti non feti at donau ancora fiducia a Di Francesco, ma in sa cida passada dd’at allonghiau su cuntratu, chi scadiat in su 2022, finas a su 2023.

Giulini at chistionau cun Sky de custa cosa e at spantau a totus: “Eus allonghiau su cuntratu de Di Francesco po di donai ancora prus fortza, ddu boliaus annuntziai cun tres puntus de festai ma, a dolumannu, non ce dda eus fata. Totu nosu depeus donai calencuna cosa de prus”. At duncas sighiu fueddendu de s’acabu de su gironi de andada: “Teniaus un’atru spetu, e catodixi puntus funt pagus in is primas digianoi partidas, iaus agatau is mesuras giustas, ma de candu s’est strupiau Rog is cosas funt mudadas. Imoi, mi parit, ca seus torrendu a giogai beni e Nainggolan e Duncan nos ant a donai una manu de agiudu. A dogna manera scieus ca est dificili meda a intrai in campu cun sa conca grai”.

Di Francesco est cuntentu meda de su cuntratu allonghiau e non ddu mandat a nai: “Soi cuntentu ca su presidenti at bidu ca impignu e trabagliu non funt mai mancaus. S’auguriu miu est cussu de donai felicidadi e allirghia a su presidenti e a is tifosus”. De sa partida invecias at nau: “Nosi depeus tirai de conca custu tempus legiu e si podit fairi feti cun su trabagliu”.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto:https://www.fantacalcio.it/serie-a/ultima-giornata/01_01_0001/genoa-cagliari-fantacalcio-399903