Mortus ancora positivus, sanaus de tempus meda chi benint contaus intru de is malaidus, Rsa chi tenint su certificau de acabu de sa cuarantena chi po s’ATS invecias funt ancora perigulosas.

De dominigu passada, e po duas cidas, sa Sardigna no est prus groga ma est passada a colori arangiu, chi bolit nai ca is mesuras, massimamenti po su cumerciu, funt prus grais. Unu treulu mannu po totus chi tocat a fairi passai inderetura.

In s’interi dominigu eus tentu atrus 207 impestaus e atrus tres mortus, cun sa percentuali de positividai sempiri oguali a su 6,4%. Is impestaus nous ddus contaus in totu is zonas: cincuanta in sa Citadi Metropolitana de Casteddu, corantaseti in Tatari, corantases in Nugoro, trintases in Aristanis e bintotu in sa provincia de su Sud Sardigna. De candu est cumentzada custa pesta legia in sa terra nosta si contant 37.258 impestaus in pissu de 555.999 tamponis fatus. Is mortus s’acostiant a is milli in totu e funt erribaus a 952. Crescendu finas cussus chi s’agatant in is aposentus de terapia intensiva, imoi funt corantotu; 472 invecias funt sempiri a intru de is ispidalis, ma non aici postus mali; is personis incungiadas in domu funt 16.483. De dominigu contaus, però, trexentus sanaus in prus e imoi seus erribaus a 18.856 in totu.

Is 37.258 impestaus aici funt dividius in Sardigna: 8.567 in sa Citadi Metropolitana de Casteddu, 6.146 in sa provincia de su Sud Sardigna, 3.040 in provincia de Aristanis, 7.486 in cussa de Nugoro e 12.019 in cussa de Tatari.

In Italia si funt abascendu is numurus e dominigu si funt tentus 8.561 impestaus nous chi faint bessiri su numuru de candu est cumentzau totu a cuasti dus milionis e mesu. Is mortus puru, a ddus ligiri aici a fridu, funt de unu numuru spantosu: 85.881! Candu at a acabai totu custu? Sa genti est stanca e no ndi podit prus, ma de cussu chi parit depeus abitai cun su virus po ancora unu pagu de tempus.

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: http://www.erasmusplus.it/indicazioni-dellagenzia-erasmus-indire-per-la-gestione-dellemergenza-covid-19/