Is urtimas duas partidas po sa Torres non funt stetias de arregodai. A innantis in Carrara nd’at boddiu cincu gol e sa dominigu infatu, in Sassari, at perdiu spantosamenti cun su Sestri Levante, chi s’agatat in is partis bascias de sa classifica de sa Serie C, in su Gironi B. Est sempiri a is palas de su Cesena, chi at allonghiau, e immoi si depit castiai is palas de is atras scuadras chi ant acurtzau. Finas po custu is dirigentis sassaresus ant decidiu de ponni fortzas noas in sa scuadra e at comporau a Aleandro Rosi, nasciu in su 1987 chi in is urtimus cinc’annus at giogau sempiri cun su Perugia.

“Apu giogau sa Champions League cun sa Roma, ma candu tenis su togu aintru e s’umiltadi contat pagu sa categoria aunia giogas”, custus is fueddus de su giogadori romanu. Fut chena scuadra e si fut poderendu in orma a sa sola, a innantis de su lompimentu in sa Torres. Est carrigu de seguru: “Soi allirgu meda e tengiu fogu aintru de mei, ma ddu depu dosai. Non tengiu pressi ma, a pagu a pagu, depu cumprendiri comenti possu agiudai una scuadra chi at spantau a totus in custu campionau. Nemus s’aspetaiat cussu chi funt fendu e deu mancu ddue apu pensau candu m’ant cicau”.

Longu meda est su contu de Aleandro Rosi in su fubalu, massimamenti in Serie A aunia at giogau, cun is maglias de sa Roma, su Parma, sa Fiorentina, su Frosinone, su Genoa e su Sassuolo, po 241 bias. In prus at giogau finas cun is maglias de su Chievo, de su Livorno, de su Siena e de su Crotone.

Giogadori chi imboddiat totu sa parti de sa drestra de su campu. “In is urtimus annus apu gioagu prus che a totu in sa difesa cun tres ominis agiudendu o a drestra o a manca is lateralis. Depu nai ca mi pragit meda. Bogliu ancora giogai, finas chi s’idadi est arta e soi cunvintu ca in custa scuadra possu ancora donai meda”.

 

 

Màuru Mura

 

Martis, su ses de friargiu de su 2024

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://www.sportitalia.com/serie-c/ufficiale-torres-aleandro-rosi-e-un-nuovo-giocatore-62297