In sa torrada eletorali aunia s’andaiat unu contras de unu, su centrumanca, po is amministrativas, bincit in Bari e Firentze e finas in atras citadis mannas.
In sa capitali de sa Puglia Vitu Leccese, agiudau de su Partidu Democratigu e is listas civicas, spantat de averas poita at pigau prus de su 70% de is votus, lassendu a un’ala, in basciu meda Saveriu Romito, candidau de su centrudrestra.
Festa manna finas in sa capitali Toscana, aunia sa candidada de su centrumanca, Sara Funaro, bincit contras de Eike Schmidt, candidau de is partidus guvernativus: 60% de is preferentzias funt andadas a sa Funaro, in su mentris chi Schmidt s’est depiu acuntentai de su 40%. Candu funt ancora contendu is votus, ma sa situatzioni fut crara a totus, ambos is candidaus de su centrumanca ant erriciu la lamada de sa segretaria de su Partidu Democratigu Elly Schlein, chi s’est allirgada meda po custas duas vitorias.
Su centrudrestra at perdiu finas in Cremona, aunia bincit su candidau a sindigu de su centrumanca Lionardu Virgilio cun su 50,3% de is votus. In Potentza sa matessi cosa cun Pissenti Telesca chi at pigau su 65%, aici comenti in Perugia cun Vitoria Ferdinandi chi bincit de duamila e cincuxentus votus contras de sa candidada Margarita Scoccia.
In Molise si votaiat in sa capitali Campobasso e finas innoi bincit su centrumanca cun sa candidada Marialuisa Forte.
Contendu finas Casteddu, aunia at bintu, chena andai a sa torrada eletorali de unu contras de unu, Massimu Zedda, duncas in totu is ses capitalis de Regioni aunia si votaiat in custu mesi de làmpadas at bintu su centrumanca.
A su centrudrestra abarrant duas citadis: Vercelli, aunia bincit e diventat sindigu Robertu Scheda e Lecce cun Adriana Poli Borbone.
De prangiri, a ligiri beni is numurus, sa genti pagu chi at votau: feti su 47,71% de cussus chi ddu podiant fairi.
Màuru Mura
Martis, su binticincu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.open.online/2024/06/24/elezioni-comunali-ballottaggi-risultato/
