Est mortu, po mori de su Covid, Francu Marini, politicu e sindacalista, teniat otantaset’annus. At fatu su segretariu generali de sa Cisl e, a pustis, su presidenti de su Senau, su ministru de su Trabagliu, su segretariu de su Partidu popolari, in segus chi sa Demogratzia Cristiana si ndi fut sciusciada e su euruparlamentari.

A su cumentzu de su mesi passau fut positivu a su coronavirus e s’agataiat in s’ispidali Santu Camillu de Lellis de Rieti. Sa nova de sa morti dd’at donada cun d’unu tweet Pieruluisu Castagnetti chi at arregodau s’amigu comenti “omini sinceru, forti e fideli a unu grandu ideali: sa libertadi comenti prima cosa po sa demogratzia e sa giustissia. Cussa chi contat”.

Medas de averas is politigus chi ant arregodau a Marini: “Oi prangeus sa morti de Marini, politigu e sindacalista mannu, omini intreu – at scritu sa presidenti de su Senau Elisabeta Casellatti – Presidenti de su Senau e Ministru, est stetiu unu protagonista mannu de sa storia republicana. S’Italia s’at arregodai cussu chi at fatu Marini in is chistionis de su trabagliu e de sa demogratzia. A sa familia erribit sa tristesa mia e de totu su Senau”.

Su presidenti de sa Camera Orrobertu Fico narat: “Su dolori miu po sa morti de Francu Marini, un’omini de su Stadu. Protagonista mannu in sa politiga e in su sindacau. Deu e totu sa Camera seus a su costau de totu sa familia sua”.

“Nos at lassau Francu Marini. Unu Italianu mannu. Non connosciat fatigas a cumbatiri po difendiri su benidori e is diritus de is trabagliadoris. Protagonista e ghia de is catolicus demograticus. po totus cussus chi ddu ant connotu fut un’esempiu po is cosas chi pensaiat e po sa libertadi. De oi seus totus unu pagu prus assolus”, at scritu, invecias, su segretariu de su Pd Nigola Zingaretti in Facebook.

Mateu Renzi, de Italia Viva, at scritu in is social feti dus fueddus: “Adiosu Francu”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.huffingtonpost.it/entry/franco-marini-e-morto_it_6022393ac5b6173dd2f913e9