Est Ademola Lookman s’eroi in su noti de ammaju de s’Atalanta in su Aviva Stadium de Dublinu. Su giogadori, de arreigini nigeriana, difati intru de sa prima mesora de partida, a su minutu de 12 e de 26, ponit in genugu is Campionis de Germania de su Bayer Leverkusen, e in sa parti de dus, a su minutu de 76, torrat a fairi gol e arregalat a sa scuadra de Bergamu s’Europa League po sa bia de unu. Est a nai ca finas a immoi s’Atalanta iat bintu feti una Copa Italia in su 1963. Is piciocus de Gasperini, gratzias a custa partida de spantu, godangiant finas su diritu de si giogai sa Supercopa europa contras de cussa chi at a binciri sa Champions Leaugue, una intru de Real Madrid e Borussia Dortmund. Xabi Alonso, chi at giai bintu su scudetu in Germania e s’at a giogai sa copa natzionali contras de su Kaiserslautern, si frimat a cincuantunu partidas bintas o paregiadas.
Is nieddus asulus de Bergamo partint meglius e a pustis dogi minutus faint inderetura gol: Koopmeiners donat sa bocia a Zappacosta, chi de sa parti drestra ponit a su centru de s’area aunia lompit Lookman chi non sbagliat. Dapoi de unu cuartu de ora, su matessi nigerianu, fait un’atru gol spantosu: fait passai sa bocia intru de mesu de is cambas de Xhaka e cun dd’unu tiru a giru dda ponit in su corrunconi de sa porta a is palas de Kovar.
Is tedescus s’incrarant in is orus de Musso feti a pustis de sa mesora de giogu cun Grimaldo, ma non c’at nudda de fairi. A pustis sa parti de unu de sa partida Gasperini ponit in campu Scalvini a su postu de Kolasinac e is tedescus si papant unu gol cun Fripong. A sa mesora de sa parti de dus Lookman serrat sa cuntierra cun dd’unu atru gol de spantu e s’orrestu de sa partida est cosa facili de acabbai. Candu s’arbitru sulat po tres bortas podit cumentzai sa festa in Dublino, ma massimamenti in totu sa citadi lombarda.
Màuru Mura
Giobia, su bintitres de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.calciomercato.com/news/latalanta-vince-leuropa-league-ed-entra-nella-storia-le-foto-del-22527
